Kompleksi i Arbanës, zyrtarisht selia e bluve
Kompleksi stërvitor i Arbanës, ku Dinamo ka disa javë që po stërvitet, tashmë është zyrtarisht pronë e klubit blu. Presidenti Marko Pontreli dhe ish-pronarët e kompleksit kanë firmosur marrëveshjen e shitblerjes dhe tashmë blutë kanë rezidencën e tyre. Lajmi konfirmohet për gazetën nga vetë presidenti Pontreli. Ky është një lajm shumë i rëndësishëm, në fakt, ndoshta më i rëndësishëm se merkatoja e verës dhe përbërja e skuadrës së sezonit të ri. Po të kemi parasysh se sa shumë ka vuajtur Dinamo vitet e fundit, duke u endur sa andej-këndej, pasi u dëbua nga kompleksi i saj historik, është vërtet një lëvizje për t’u përshëndetur. Kështu, Dinamo mund të hedhë themelet e së ardhmes nga kompleksi i Arbanës, që do të jetë edhe selia e klubit kryeqytetas. Gazeta mëson gjithashtu se në këtë kompleks do të bëhen punime për ta kthyer atë në multifunksional, ku ekipi të ushtrojë gjithë aktivitetin e vet. Pritet të nisin shpejt punimet për ndërtimin e dhomave të futbollistëve, restorantit dhe sallës së forcës. Blutë do të kenë tani e tutje gjithë qetësinë e nevojshme për të punuar si një klub i kompletuar. Pozicioni i kompleksit stërvitor në Arbanë është i tillë, ku stafi teknik dhe futbollistët mund të stërviten larg zhurmave, në një ambient të rrethuar nga pemët. Në planet e Dinamos është edhe krijimi i skuadrës së 21-vjeçarëve dhe një kompleks sportiv ishte i domosdoshëm. Ky është një hap shumë i rëndësishëm për projektin e kthimit të Dinamos në nivelin e saj të dikurshëm, edhe pse filozofia e drejtuesve të rinj është e përqendruar te puna me të rinjtë.