Van Basten: De Ligt gaboi me Juven, nuk pashë përmirësim
Pa Kielinin (e dëmtuar që në muajin shtator), Matajs de Ligtit iu desh që të rritej më shpejt se ç’duhet te Juventusi. Ndeshje pas ndeshjeje, holandezi u transformua në një kolonë jetike të skuadrës së Sarrit dhe një lojtar i pazëvendësueshëm për kampionët e Italisë. Nota 7.5 e “Gazzetta dello Sport” mbi sezonin e tij nuk gënjen: “E mësoi shpejt artin e ‘mbrojtësit italian’ dhe 2020-a ishte një vit spektakolar për Matajs. Siç thonë amerikanët, ‘vetëm qielli është limiti’”. Megjithatë, ka edhe nga ata që nuk e mendojnë kështu dhe nuk është një figurë e çfarëdoshme. Po flasim për bashkatdhetarin Marko van Basten, legjendën e Holandës dhe të Milanit, i cili duket se nuk ka parë asnjë rritje apo përmirësim te De Ligti. “Nuk mendoj se Matajs ka bërë diçka më mirë sesa në sezonin e kaluar me Ajaksin, - shprehet Van Basten për “Ziggo Sport”. – Sigurisht, fati i tij i keq bëri që të mos e kishte përgjatë të gjithë sezonit Kielinin përkrah, të vetmin lojtar që bën skuadër te Juventusi. Bonuçi gjatë gjithë vitit ka bërë gjërat e tij, nuk organizonte dhe nuk i tregonte De Ligtit se çfarë duhej të bënte. Ndërsa Kielini është një që vë veten në dispozicion të të tjerëve. Prandaj, mendimi im është që De Ligt do të kishte mësuar më shumë nëse zgjidhte Realin e Madridit, Barcelonën apo Mançester Sitin. Për më tepër, do t’i kishte lejuar vetes që të luante në një kampionat më interesant, sepse Seria A ka një nivel më të ulët sesa kampionatet e skuadrave që përmenda më parë”, përfundoi Marko van Basten.