Goxhaj drejt Azerbajxhanit, pritet firma te Gabala
I larguar nga Bylisi prej disa javësh, Jurgen Goxhës i "buzëqesh" fati. Mbrojtësi pritet që të luajë jashtë vendit gjatë sezonit të ardhshëm dhe destinacioni është Azerbajxhani. Dhe bëhet fjalë për një pistë konkrete, pasi lojtari është shumë pranë firmës me Gabalan (ekip ku luan Xhejms Adeniji dhe më herët ka qenë edhe Sabjen Lilaj). Marrëveshja pritet që të mbyllet shumë shpejt, pasi palët kanë diskutuar edhe për termat financiarë. Ai do të përfitojë jo pak, por 9 mijë dollarë në muaj. Goxha spikati jo pak në Ballsh gjatë këtij kampionati. Edhe pse është një qendërmbrojtës tipik, ai u duallua edhe si sulmues. Në jo pak ndeshje i erdhi në ndihmë ofensivës, duke shënuar edhe 5 gola me "peshë".
PLANET - Bylisi pritet që të jetë një skuadër aktive në merkaton e kësaj vere dhe hapi i parë mund të jetë rikthimi i lojtarëve të cilët i kanë huazuar në skuadra të Kategorisë së Parë dhe të Dytë. Ballshiotët kanë një skuadër tjetër të "shpërndarë" nëpër Shqipëri, duke filluar nga klube si Devolli, Oriku, apo dhe Pogradeci. Portieri Kostandin Dramolli dhe mesfushori Jurgers Liçkollari ishin pjesë e liqenorëve në sezonin e fundit, mbrojtësi i majtë Sadik Çela u aktivizua te Devolli, si edhe mesfushori Ervis Kasaj. Pa harruar edhe mesfushorin Amar Kapllanaj që në dy sezonet e fundit ka luajtur në radhët e skuadrës së Tiranës B. Këta lojtarë pritet që të plotësojnë organikën e mallakastriotëve, ndërsa do të jetë trajneri Veljko Dovedan ai që do të vendosë nëse do të rrinë apo jo për sezonin 2020-2021, pasi t'i testojë ato. Krahas ndërtimit të skuadrës së parë, në Ballsh do të shohin mundësinë e afrimit të lojtarëve të rinj të perspektivës. Pasi është bërë e detyrueshme edhe pjesëmarrja në garë zyrtare e skuadrës U-21, ky hap është i pashmangshëm. Klubi do të bazohet te disa lojtarë që u kalon mosha nga skuadra U-19 e akademisë, ndërsa në ekipin e parë ka futbollistë të cilët janë ende të rinj dhe luajnë me U-21, që kanë qenë titullarë në skuadrën e parë si: Hadroji, Qardaku apo ndonjë tjetër. Ndaj edhe merkatoja duhet që të jetë e përzgjedhur detyrimisht këtë verë, pasi do të mendohet për dy skuadra.