Menaxheri ka 20% të kartonit të Bares, Mihaj dhe Kaçe drejt Gjermanisë
Espanjoli më pranë, për mesfushorin interesime nga Italia dhe Franca
Keidi Bare është një nga lojtarët më të vlefshëm që ka aktualisht Malaga në pronësi. Skuadra arriti që të sigurojë mbijetesën në Ligën e Dytë spanjolle, me gjithë vështirësitë financiare që kaloi gjatë këtij sezoni. Teksa Bare dhe Sadiku ishin dy nga lojtarët më të rëndësishëm të ekipit, ky i fundit rikthehet te Levante që e ka në pronësi, ndërsa për mesfushorin kuqezi kanë nisur menjëherë interesimet e skuadrave të tjera. Njësoj siç kanë përfunduar në merkato edhe dy lojtarë të tjerë të Kombëtares, Enea Mihaj dhe Ergys Kaçe.
KEIDI BARE - Espanjol është skuadra e cila mund të përfitojë shërbimet e Keidi Bares. Në mediat spanjolle bëhet me dije se skuadra mund të paguajë nga 1.5-2 milionë euro për kartonin e shqiptarit. Mirëpo, Malaga nuk duket shumë e bindur.
Së fundmi, mediat iberike kanë zbuluar se shkak për këtë është fakti se Malaga ka vetëm 80% të kartonit të mesfushorit. Por pjesa tjetër? Huan Manuel Lopez, menaxheri i tij zotëron këtë përqindje të kartonit. Kjo në bazë të marrëveshjes që ka bërë me
Malagën në momentin që ka sjellë Baren në Malaga, duke ia marrë Atletiko Madridit me parametra zero. Teksa shqiptarin e duan disa skuadra në Spanjë, zërat e merkatos e lidhin atë edhe me një kalim të mundshëm drejt Italisë ose Francës. Për momentin,
skuadrat nuk bëhen me dije, por interesimet nuk kanë munguar nga këto dy kampionate. MIHAJ DHE KAÇE -
Qendërmbrojtësi dhe mesfushori i Kombëtares pritet të kenë një destinacion të përbashkët: Gjermaninë. Për qendërmbrojtësin, pritet që të ketë skuadra nga Bundesliga gjermane që do të arrijnë të sigurojnë shërbimet e tij. Edhe për mesfushorin kuqezi, Gjermania shihet si mundësi, por në Bundesligën Dy. Vetë menaxheri ka bërë me dije se ka interesime konkrete dhe po studion mundësitë. "Kemi pasur bisedime konkrete dhe po e shohim si mundësi reale që Kaçe të vendoset fillimisht në Bundesligën Dy. Si një hap i parë për t'u ambientuar, përpara se të bëjë kalimin në Bundesligë", është shprehur Kagioulis, menaxheri i Kaçes.