Kristiano paguhet katër herë më shumë se De Ligt, krisje te "Zonja"
"Gazzetta dello Sport" zbulon rrogat e skuadrës së parë të Juventusit dhe lëshon alarmin se paga e Kristiano Ronaldos ka shkaktuar pakënaqësi në dhomat e zhveshjes. Pandemia e Koronavirusit ka ndikuar shumë në financat e "Zonjës së Vjetër" dhe rrogat e futbollistëve të rinj që do të firmosin në Torino nga tani e tutje do të jenë më të ulëta. Por edhe rrogat aktuale kanë disnivele të jashtëzakonshme, duke shkaktuar jo pak rrudhje buzësh mes futbollistëve kryesorë të skuadrës së Mauricio Sarrit. Pakënaqësitë e para vijnë normalisht për pagën që përfiton lojtari më i paguar në "Allianz Stadium",
Kristiano Ronaldo, pavarësisht se "CR7" është një markë e vërtetë marketingu dhe ka shumëfishuar shitjet e marketingut të klubit, duke justifikuar gjithçka portugezi përfiton. Rroga neto e sulmuesit 35-vjeçar te bardhezinjtë është 31 milionë euro në vit, thuajse katërfishin e asaj që përfiton lojtari i dytë më i paguar i klubit, mbrojtësi holandez Matajs de Ligt. Lojtarë si Aron
Ramsej dhe Adrien Rabio, të cilët erdhën me parametër zero verën e shkuar në Serinë A, kanë përfituar nga kjo gjë duke firmosur kontrata me rroga shumë të larta. Tani kampionët e Italisë po kërkojnë të transferojnë nga Barcelona Artur Melon dhe i ofrojnë mesfushorit brazilian vetëm një rrogë prej 3.5 milionë eurosh neto në vit, krahasuar me 7 milionët që marrin si mesfushori uellsian ashtu edhe ai francez. Pas Ronaldos dhe De Ligtit, rrogat më të larta te kampionët e saposhpallur të Italisë i marrin Gonzalo Higuain dhe Miralem Pjaniç, dy paga prej 7.5 milionë eurosh secila, të cilat klubi shpreson t'i shkurtojë këtë verë me transferimet e tyre. Ajo që bie në sy është rroga e Paulo Dibalës, i cili ndonëse është një nga lojtarët kryesorë të "Zonjës", e shikon veten të renditet vetëm në vend të pestë sa i përket shpërblimit financiar që merr në fund të vitit (7.3 milionë euro). Dy lojtarët më pak të paguar aktualisht në skuadër janë portieri Xhanluixhi Bufon (ishkapiteni ka normalisht një pagë simbolike prej 1.3 milionë eurosh në vit dhe portieri i tretë, Pinsoljo (vetëm 300 mijë euro).