Titulli, CR7 dhuratë vetes një Bugati 10 milionë euro
Vetëm 10 ekzemplarë në botë, çelësat në dorë në 2021-shin
Garazhi ishte i pa sur (ka Ferrari të ndryshme, mes të cilave edhe Rolls Rojs, MekLaren...), por si thonë: "Sa më shumë të kesh, aq më shumë do". Dhe Kristiano Ronaldo a mund ta humbiste këtë rast? Sigurisht që jo. Dhe ja, kampioni i Juventusit i ka bërë dhuratë vetes për titullin e sapofituar një Bugati 110. Është një makinë e rrallë e cila e merr emrin prej Bugatit EB110, e prodhuar në fillim të viteve 1990 dhe është realizuar për nder të 110 viteve të krijimit të kompanisë. I prezantuar fillimisht në fabrikën e Bugatit në Kompagalino dhe zyrtarisht i prezantuar te publiku në gusht 2019, kjo makinë është e bazuar te Shiron (një tjetër veturë në garazhin e portugezit). Peshon 20 kg më pak sesa Shiron dhe motori prej 16 valvulash 8 litërsh jep 100 kuaj fuqi më shumë se kjo e fundit, duke arritur në total 1 600 kuaj fuqi. Shpejtësia kufizohet elektronikisht kur arrin në 380 km/h. Nga 0-100 km/h i arrin në vetëm 2.4 sekonda, 0-200 në 6.1 sekonda dhe 0-300 në 13.1 sekonda. Dizajni i makinës është revolucionarizuar, ndërsa është preferuar ngjyra e bardhë. Çmimi i saj bazë i 10 ekzemplarëve që do prodhohen deri në vitin e ardhshëm është 8 milionë euro, por bashkë me personalizimet mund të mbërrijë deri në 10 milionë euro. Ronaldos në fakt nuk i është dorëzuar ende. Çelësat e saj, 35-vjeçari do t'i ketë në dorë në vitin 2021. CR7 është i dashuruar me makinat e prodhuara nga gjiganti francez. 35-vjeçari ka në garazhin e tij edhe 8 Ferrari dhe disa BMW, por një makinë kaq ekskluzive dhe me një motor të tillë i kishte munguar. Në fakt, autori i 31 golave në Serinë A këtë sezon, i ka bërë pak ditë më parë vetes edhe një tjetër dhuratë. Ish-sulmuesi i Mançester Junajtid dhe Realit të Madridit bleu një jaht prej 6 milionë eurosh, të cilin e reklamoi për herë të parë vetëm pak ditë më parë gjatë
pushimeve të fundjavës me familjen e tij. Me të përfunduar sezoni, ai do ta shijojë më mirë atë gjatë pushimeve. Jahti ka 5 dhoma, 6 tualete, dy zona relaksi, një sallon të përmasave të mëdha, një dhomë ngrënieje dhe një kuzhinë moderne. Sigurisht, ai do të sakrifikonte disa ditë më pak pushimi në rast se Juventusi kalon pengesën e Lionit në 1/ 8-at e Ligës së Kampioneve dhe shkon në Lisbonë. Dhe nëse në vendlindjen e tij "Zonja" do të ketë këtë herë më shumë fat, duke kaluar përtej çerekfinaleve dhe ndoshta gysmëfinaleve, atëherë CR7 do të kishte përballë një trofe tjetër që e lakmon me skuadrën e tretë në karrierë. Pasi e ka fituar me Junajtidin dhe Realin, ai do të hynte në librat e historisë edhe për një tjetër rekord dhe pastaj duhet të mendojë seriozisht edhe për dhuratën e tretë që do t'i bënte vetes këtë verë...