Rikthehet NBA, Lejkërs dhe Jutah e nisin mbarë

Rivalitet i lartë në dy takimet e para

NBA, kampionati më spektakolar dhe më i bukur i basketbollit në botë, rifilloi më në fund sezonin e ndërprerë për shkak të pandemisë globale të Koronavirusit. Pas 141 ditësh u zhvilluan dy takimet e para, të cilat u karakterizuan nga një rivalitet i lartë dhe u vendosën me diferenca minimale pikësh. Dy sfidat e Konferencës së Perëndimit, të luajtura në orët e para të mëngjesit të djeshëm, nxorën fitimtare skuadrat Jutah Xhaz dhe Los Anxhelos Lejkërs, të cilat triumfuan respektivisht ndaj Nju Orlins dhe Klipers, në sallat e boshatisura të Orlandos. Si për ironi të fatit, njeriu i koshit të parë ishte Rudi Gobert, pikërisht lojtari i parë që rezultoi pozitiv me "COVID" në NBA. Gjithçka startoi me himnin, teksa lojtarët u ulën në gjunjë, duke bërë një gjest solidarizues për vdekjen e Xhorxh Floidit, një ngjarje që e ka prekur shumë komunitetin e basketbollit amerikan.

Ndeshja që shënoi zyrtarisht rinisjen e NBA-së ishte ajo ndërmjet Nju Orlins Pelikans dhe Jutah Xhaz, me këta të fundit që triumfuan me vështirësi në shifrat 106-104. Suksesin skuadrës nga "Salt Lake City" ia dhuroi pikërisht Rudi Gobert, basketbollisti i parë i NBA-së që rezultoi pozitiv me Koronavirus. Qendra franceze ishte vendimtar, teksa realizoi dy gjuajtjet e fundit të lira, të cilat prishën ekuilibrin vetëm disa sekonda para përfundimit të takimit. Ndonëse ishte deri

në 16 pikë dizavantazh, Jutah reagoi duke marrë një fitore të merituar. Pikëshënuesi më i mirë për "Jazz" ishte Xhordan Klarkson me 23 pikë. Ndërsa shkëlqyen gjithashtu Donovan Mitçell dhe Majk Konlei, nga 20 pikë secili. Nga ana tjetër për Pelikans, nuk mjaftuan 23 pikët e realizuara nga Brandon Ingram.

Që në start NBA dhuron një superfidë, teksa përballë njëra-tjetrës ishin dy skuadrat e Los Anxhelosit. Një sfidë derbi ndërmjet dy skuadrave që kryesojnë në Konferencën e Perëndimit. Mes emocionesh të forta Lekërs mposhtën Kipers, në një takim të vendosur vetëm në sekondat e fundit. Antoni Devis ishte në një formë fantastike dhe bëri diferencën në këtë sfidë. Ish-lojtari i Pelikans ishte protagonist absolut i mbrëmjes dhe këtë e dëshmojnë statistikat e regjistruara: 34 pikë, 8 rikuperime në tabelë dhe 4 asiste. Ndërkohë, LeBron Xhejms shënoi 16 pikë. "Mbreti" u pa në vështirësi në tri periodat e para, megjithatë ai rezultoi deciziv në çastet e fundit të takimit, si në fazën sulmuese ku realizoi 4 pikë shumë të rëndësishme, ashtu dhe në mbrojtje teksa ndali sulmin final të Klipers. Ekipit të Dok Rivers, nuk i mjaftuan paraqitjet e Kauhi Leonard dhe Pol Xhorxh, të cilët shënuan respektivisht 28 dhe 30 pikë. Ndërsa Klipers në këtë sfidë nuk kishin në dispozicion Lu Uilliams dhe Montrezl Harell.