Teko: Krenar që po shkruaj historinë te Laçi

Mesfushori brazilian mburret në vendlindje për arritjen me skuadrën kurbinase

Laçi ka treguar se di të godasë në merkato, duke afruar elementë të spikatur në ekip. Përveç sulmuesit Kirian Nuabueze, që u shpall golashënuesi më i mirë i Superiores në sezonin e fundit me 24 gola, kurbinasit afruan para një viti edhe një sulmues brazilian, që u integrua me vonesë në ekip. Bëhet fjalë pikërisht për Teldiano Guimaraesh Franka Xhunior ose, siç thirret shkurt, Teko. Braziliani ka shënuar gjashtë gola për Laçin në sezonin e fundit, të cilin e mbyllën në vendin e tretë. 25-vjeçari ka dhënë kontributin e tij në realizimin e objektivit, ku kurbinasit marrin pjesë në Ligën e Europës. Në një prononcim të dhënë për mediat braziliane, Teko ka treguar se është shumë i lumtur me atë që ka arritur këtë sezon me Laçin, ku ka mundësi tani të luajë në Ligën e Europës. Sulmuesi ka pohuar se fillimi ka qenë i vështirë, por më pas u përshtat dhe e quan historike atë që ka arritur këtë vit me kurbinasit. Teko është golashënuesi i tretë më i mirë i ekipit, ku ka realizuar 6 gola dhe ka dhënë 5 asiste në kampionat. "Jam shumë i lumtur për gjithçka që kemi arritur si skuadër këtë sezon. Falënderoj Zotin për kampionatin e bërë. Kam realizuar 6 gola dhe kam dhënë 5 asiste, ndërkohë që më e rëndësishmja ishte që arritëm qëllimin e klubit për të zënë një nga tri vendet e para dhe për të luajtur në Kupat e Europës.

Në fillim ishte pak e vështirë për mua për t'u përshtatur me gjithçka gjeta në Shqipëri. Por, tani jam përshtatur plotësisht. Jam krenar për gjithçka që po më ndodh këtu dhe kjo vjen si rezultat i punës së palodhur. Ishte një kampionat i veçantë, kemi bërë histori dhe për mua është krenari të futem në historinë e Laçit. Kjo është ajo që kam menduar kur kam ardhur në Laç, të shkruaj historinë", u shpreh Teko për "Futbol Interior".