Kuqezinjtë, pa Champions 2021 do të ishte dështim
"Nuk mendoj se në fund të sezonit 2020-'21 do të ishim të lumtur me një vend të gjashtë". Me këtë fjali të thënë në konferencën e fundit për shtyp, Stefano Pioli pranoi hapur atë që do të jetë synimi i Milanit në sezonin e ri. Siç pritej, kuqezinjtë do të nisin vitin e ri futbollistik me ambicie dhe një renditje jashtë katër të parave do të ishte dështimi i radhës për një klub që mungon në Ligën e Kampioneve prej gjashtë vjetësh. Pikënisja do të jetë pikërisht mbyllja e sezonit të fundit, kur pas ndalesës prej pandemisë, "Djalli" grumbulloi 30 pikë në 12 ndeshje të Serisë A pa u mundur asnjë herë. Agresiviteti dhe golat ishin tiparet dalluese, teksa disa lojtarë më në fund dhanë atë çka pritej prej tyre. HOV CILËSOR
13 golashënues të ndryshëm dhe 35 gola në total janë një tjetër e dhënë që Stefano Pioli e shtrëngon fort, sidomos kur i duhet të planifikojë sezonin e ri. Kuqezinjtë tashmë janë mësuar më kalendarin e ngjeshur, teksa ngelet për t'u parë se si do të ndikojë në paraqitjet e lojtarëve prania e publikut (edhe pse me numër të reduktuar). 13 ndeshje me portë të paprekur janë një tjetër arritje e mirë që duhet ruajtur në sezonin e ri, teksa mbrojtja duhet të përmirësohet në vijimësinë e saj duke qenë se 50 golat e sivjetshëm mes kampionatit dhe Kupës janë një njollë, e cila duhet fshirë sa më shpejt. PIKNIBRA
Garancia tjetër mban emrin e Zlatan Ibrahimoviçit. Suedezi vijon bisedimet me klubin për rinovimin e kontratës, por kontributi i tij është i pamohueshëm. 10 gola në kampionat dhe 1 në Kupë në 19 prezenca bëjnë që Milani të ketë një bazë solide në vijën e parë ku përveç suedezit ka shkëlqyer edhe Ante Rebiç. Sigurisht do të nevojitet që Çalhanoglu të ruajë ritmin e sivjetshëm dhe të shpërthejë Leao, megjithatë në diskutimin për kualifikimin në Champions nuk do të pranohen apo tolerohen lëshime. Misioni tashmë dihet dhe do të marrë fill kur kuqezinjtë të grumbullohen pas tri javësh kur, përveç suedezit, do të mbështeten edhe te tashmë i konsoliduari 4-2-3-1. Edhe merkatoja e klubit është orientuar nga skema në fjalë, ndaj themelet e Champions-it duket se janë hedhur.