Revolucioni te Vllaznia, Suad Lici: Nuk jam kukull
Dilema për trajnerin Brdariç, sponsori Xhaferi: Projekt për Europën
Vllaznia e re e nis me prezantimin e drej torit sportiv kroat, Matko Djarmati, ndërsa mbetet e paqartë se kur klubi do të bëjë të njëjtën gjë me trajnerin Thomas Brdariç, i cili ende nuk është zyrtarizuar. Dje para medieve, krahas Djarmatit, ishte i pranishëm në konferencën për shtyp edhe administratori Suad Lici dhe sponsori Alban Xhaferi. Ish-futbollisti kroat tregoi si erdhi në Shkodër, ndërsa fillimisht foli sponsori i ri, duke treguar pse ishte vendosur për këtë emërim në një post kyç në klub. Personi që ka marrë përsipër ndërtimin e Vllaznisë në këtë prezantim të Djarmatit është shprehur se u ndikuan nga binjakëzimi me klubin kroat, Rijeka. "Ky finalizim erdhi si rrjedhojë e një bashkëpunimi që kemi bërë me klubin e Rijekës. Është një binjakëzim me qëllimin e mirë për të ndarë eksperiencën e tyre me ne. Ishte propozim i tyre, dhe pasi dëgjuam edhe planin e Matkos për klubin dhe objektivin që kemi për vitin tjetër, u arrit ky akord. Jam optimist që sezonin tjetër Vllaznia do të jetë me rezultate e objektiva të rinj, që janë kupat e Europës. Uroj dhe shpresoj që të jetë një fillim i mbarë për të gjithë ne dhe t'ia dalim sa më mirë", është shprehur fillimisht para mediave sponsori Xhaferi.
DREJTORI I RI
Drejtori i ri sportiv, Matko Djarmati, ka vënë theksin te puna që do të bëhet në klub, por edhe te transparenca që do të tregojë me mediat për çdo gjë që ndodh te Vllaznia. "Në radhë të parë, dua të them se për një klub të madh siç është Vllaznia, kanë rëndësinë e tyre edhe gazetarët. Do të jemi të paktën një herë në javë bashkë për të diskutuar mbi gjithçka. Unë që kur kam ardhur në Shkodër, e kam ndjerë peshën e këtij emri të madh dhe jeta ime ka ndryshuar me 360 gradë. Kam ardhur nga propozimi i klubit të Rijekës për të ndryshuar Vllazninë në një mënyrë që e di unë. Ne jemi në pritje të finalizimit të bashkëpunimit, që nuk është arritur ende, pasi drejtori sportiv i klubit të Rjekës kishte problemet e veta. Por në të ardhmen them se gjithçka do të shkojë siç edhe kemi diskutuar. Klubi i Rijekës do të jetë në kupat e Europës këtë sezon dhe ne do të kemi një
eksperiencë me ta, që edhe në fund të këtij sezoni të realizojmë objektivat tanë. Pra, të jemi në kupat e Europës", deklaroi Djarmati. I pyeture ku do të konsistojë ky bashkëpunim me klubin kroat, ai u shpreh: "Unë isha dy javë në Kroaci për të përfunduar këtë binjakëzim. Por siç edhe e thashë, drejtori sportiv i Rijekës kishte problemet e veta. Kontrata ka shkuar deri te bordi i klubit dhe pret finalizimin. Rijeka nuk do të jetë një emër sa për të thënë apo për të bërë bujë. Brenda kësaj kontrate ato priten që të ndryshojnë disa gjëra". Ndërsa lidhur me licencën e tij për drejtor sportiv, Djarmati sqaroi: "Me informacionin që kam nga FSHF-ja, me licencën e "UEFA Pro" që kam unë të, mund ta mbuloj edhe këtë pozicion. Nga ana tjetër, mund të them se klubi m'i ka plotësuar të gjithë kushtet. Ka katër ditë që më është gjetur
edhe apartamenti dhe po jetoj në Shkodër".
ADMINISTRATORI
Administratori i klubit shkodran, Suad Lici, në fjalën e tij para mediave ka pasur fillimisht një falënderim për ishdrejtorin sportiv, Engin Firat, ndërsa ka bërë të ditur se pas ardhjes së sponsorit të ri, në pozicionin që mban nuk do të jetë thjesht për të shpërndarë pagat që lëvron bashkia. "Në radhë të parë, dua që të falënderoj ish-drejtorin Firat, për punën që ka bërë në këto dy vite te Vllaznia. E morëm ekipin në Kategorinë e Parë dhe u organizua në më pak se 10 ditë. Ecuria jonë deri në tri fazat e para të Superiores ishte rezultative. Ndodhi ajo çfarë ndodhi për arsye të Koronavirusit, ku skuadra nuk u stërvit për disa muaj. Pastaj erdhi trajneri Hysen Dedja, të cilin e falënderoj për punën e bërë. Tani kemi zgjedhur një projekt tjetër dhe shpresoj se kemi bërë zgjedhjen e duhur me Matkon. Shpresoj që këtë vit me ardhjen e Djarmatit dhe sponsorit Xhaferi, do të kemi mundësi që të bëjmë zgjedhje edhe më cilësore. Të jemi korrektë me gjithçka dhe të eliminojmë ato vonesa që kemi pasur në pagesa. Korrektësia nuk ka munguar, por duhet që të eliminojmë vonesat", është shprehur Lici. I pyetur për ndonjë analizë për sezonin e ardhshëm, ai shtoi: "Është hera e parë që Vllaznia, pa asnjë ndihmë në këto vitet e fundit, grumbullon 46 pikë. Problemi i ndërprerjes ndikoi shumë, por edhe largimi i trajnerit Jonuz ka ndikimin e vet. Moskalimi i pasqyrave financiare dhe i fondit bëri që lojtarët të shkonin 5 muaj pa paga. Pra, u bënë shumë arsye që Vllaznia të mos shkonte aty ku donte. Por Vllaznia ka prodhuar lojëra të mira këtë sezon. Patjetër që do të bëjmë një analizë". Në fund, i pyetur për pozicionin që do të ketë në vendimmarrje, ai theksoi se nuk është te Vllaznia për të bërë rolin e kukullës. Administratori duket jashtë vendimmarrjeve në aspektin teknik të ekipit, por në lidhje më këtë, deklaroi: "Pas këtyre ndryshimeve, nuk kam si të jem xheloz për sa kohë është për të mirën e klubit. Është Vllaznia, Shkodra dhe pastaj jemi ne. Sponsori ka vendosur për këto kandidatura. Me trajnerin nuk kemi finalizuar. Jemi më shumë në kohë sesa vitin e kaluar. Kur të finalizojmë edhe me trajnerin, do të jemi edhe më të bashkuar. Këtu janë të mirëpritur të gjithë ata që duan të ndihmojnë Vallzninë, jemi të hapur dhe bashkëpunues. Besoj se kam dhënë prova se nuk jam vetëm për të dhënë paga. Sa për kukull, nuk kam nevojë që të qëndroj këtu. Rolin e kukullës mund ta bëjë ndonjë tjetër, por jo unë".