I pari shqiptar te Kosova, Federata: Morëm një supertalent
Me origjinë nga Tropoja, Edi Sylisufaj vjen nga moshat suedeze
Edi Sylisufaj bëhet lojtari i parë shqiptar i cili ka zgjedhur të përfaqësojë Kombëtaren e Kosovës. Teksa ndër vite, boshti i Kombëtares kuqezi ka qenë i përbërë me elementë që kanë origjinë nga qytetet e Kosovës, tanimë po ndodh edhe e anasjella. 20vjeçari i lindur në Suedi, por me origjinë nga Tropoja, do të jetë lojtari i radhës që do të luajë me fanellën e Kosovës. Kjo është konfirmuar nga vetë federata dardane, e cila nëpërmjet një njoftimi shkruan se Sylisufaj ka zgjedhur të përfaqësojë Kosovën. Sylisufaj ka shkëlqyer këtë sezon me Falkenbergs në Suedi, ku ka shënuar 5 gola, nga nisja e kampionatit
deri në qershor. Kujtojmë se futbollisti ka lindur në Suedi dhe ka luajtur edhe me kombëtaren e 17-vjeçarëve të këtij shteti.
Ka pasur një njoftim zyrtar nga Federata e Futbollit të Kosovës e cila ka zyrtarizuar edhe lojtarin më të ri që do të jetë në dispozicion të trajnerit
për ndeshjet në vazhdim. "Kombëtarja e Kosovës së shpejti do të ketë në radhët e saj një tjetër supertalent. Bëhet fjalë për sulmuesin e skuadrës suedeze, Falkenbergs, Edi Sylisufaj, i cili tashmë ka vendosur ta veshë fanellën dardane. 20-vjeçari i lindur në Suedi është duke shkëlqyer në fanellën e Falkenbergs në këtë edicion, ku ka shënuar 5 gola prej se ka nisur elita e futbollit suedez në muajin qershor. Ai më parë ka qenë edhe pjesë e kombëtares U-17 të Suedisë, derisa vlerësohet si njëri nga futbollistët më të talentuar. FFK tashmë ka filluar procedurat rreth rregullimit të dokumenteve të nevojshme për lojtarin dhe nëse gjithçka kryhet me kohë, atëherë ai do të mund të paraqitet në fanellën dardane qysh në shtator në ndeshjen kundër Anglisë U-21 në Prishtinë, teksa shumë shpejt mund ta shohim edhe në fanellën e Kombëtares A, ngase bëhet fjalë për një sulmues tejet të spikatur", ka shkruar faqja zyrtare e FFK-së.