“Bastexhiu” Cvajer tërbon Sarrin: Penallti inekzistente, me Juven kam ende një kontratë

“Nuk kuptoj pse një si Kuipers dërgohet që të arbitrojë në Ligën e Europës, ndërsa Cvajeri në Champions. E them publikisht se arbitri gjerman, por edhe VAR-i, këtë mbrëmje ishin thjesht të turpshëm. Një menaxhim dhe gjykim i skaduar, kundrejt të dyja penalltive”. Me këtë frazë, ish-gjyqtari italian, Graciano Çezari, sot moviolist për rrjetin “Mediaset”, ka komentuar dy penalltitë që nuk duheshin akorduar kurrsesi, duke i dalë në krahë kështu deklaratës dhe shpërthimit të trajnerit Mauricio Sarri, pas ndeshjes së djeshme: “Jam thjesht i tërbuar me arbitrin. Jo vetëm që na dha kundër një penallti inekzistente, por aksioni nisi me një faull ndaj Higuainit dhe më dhemb që të dalë kështu. Më vjen shumë keq për eliminimin, por jam i lumtur për lojën që shprehu skuadra, sepse i patëm shanset edhe për 3-1. A jam i qetë për të ardhmen? Unë di të them se kam një kontratë dhe në trup kam vetëm nervozizëm për mënyrën se si dolëm nga ky kompeticion. Pastaj, nëse ju mendoni se drejtuesit do të më gjykojnë vetëm për këtë ndeshje, unë nuk e di, sepse fakt është që ekipet italiane nuk fitojnë prej 20 vitesh në Champions dhe nuk po flas vetëm për Juven”, deklaroi Sarri.

– Për sa i përket arbitrit gjerman që gjykoi dje Juventusin me Lionin, e përditshmja “Repubblica”, kishte kujtuar mëngjesin e djeshëm se në vitin 2004 Feliks Cvajer ishte pjesë e skandalit të trukimit për disa ndeshje në Bundesligën II, që sollën burgosjen me 2 vite e 5 muaj të kryesorit Hojzer. Në ndeshjet e inkriminuara të Hojzer, Cvajer kishte qenë anësor, madje Policia i kishte bastisur edhe shtëpinë në orët e para të mëngjesit, ndonëse ai nuk u shpall fajtor në këtë çështje. Gjithsesi, njolla e bastexhiut vazhdon ta përndjekë ishanësorin Cvajer edhe pas 16 vitesh.