Zidan: Largohemi me kokën lart, asnjë qortim për Varan

"Jam në stol derisa s’ndodh diçka e jashtëzakonshme"

Më në fund e ndjen edhe ai shijen e eliminimit në Ligën e Kampionëve. Zinedin Zidan nuk e fsheh zhgënjimin për largimin në këtë moment nga Europa, ndërsa gazetarët nisin t'i vënë në dyshim edhe të ardhmen në stolin e Realit të Madridit. "Unë jam trajner i Realit të Madridit derisa nuk do të ndodhë diçka e jashtëzakonshme. Mos ma bëni më këtë pyetje për të ardhmen time. Do të pushojmë dhe pastaj do të rikthehemi sërish sezonin e ardhshëm", thotë tekniku francez, duke analizuar humbjen me Mançesterin, por pa e drejtuar gishtin nga Rafael Varan: "Unë jam përqendruar vetëm te gjërat e mira që bëmë këtu. Dakord, ishte një mënyrë e keqe për ta mbyllur sezonin, por duhet ta pranojmë humbjen. U mundëm në shtëpi edhe jashtë, dhe urime Sitit! U përpoqëm t'i ndryshonim gjërat, por nuk ishte e thënë të ishte këtë mbrëmje. Nuk kemi justifikime". Dikush i vë në dyshim aktivizimin e Hazardit (me probleme në kavilje) dhe jo të Viniciusit, por nga Zizu merr si përgjigje: "Hazard ishte 'Ok'. Dha gjithçka kishte. Nuk kishte asnjë dhimbje. Kur një skuadër humbet, të gjithë përpiqen të gjejnë arsyet. Po, Vinicius mund të kishte luajtur, por ishte radha e të tjerëve. Nuk kam asgjë më shumë për të thënë për këtë. Nuk mund të jemi të lumtur për këtë rezultat, por i tillë është futbolli. Duhet të pranojmë se patëm raste për të shënuar, por nuk i shfrytëzuam ato. Por në fund, 95% e asaj që kemi bërë këtë sezon ka qenë e shkëlqyer. Sezoni ynë në përgjithësi meriton notë shumë të lartë. Nuk ka asgjë për të qortuar Varanin. Nuk i thashë asgjë. Duhet të ngremë kokat lart dhe të provojmë sërish. Këtë u thashë lojtarëve të mi pas ndeshjes. Duhet të jemi krenarë për atë që kemi arritur këtë sezon. Nuk duhet të gjejmë justifikime për humbjen në këtë ndeshje. Dhamë gjithçka, por ndonjëherë gjërat nuk shpërblehen".