Babai i Mesit ble shtëpi në Milano me pamje nga Interi
Dekreti i Rritjes ndihmon "Suning"-un, sponsorët s'mungojnë
Horge Mesi, babai i Leos, ka marrë tashmë shtëpi me pamje nga... Interi. Kanë mundur ta konstatojnë përgjegjësit komunalë që gjatë këtyre ditëve e kanë vizituar për të kompletuar procedurën që do t'i lejojë të përfitojë rezidencën milaneze. Lëvizja ka me siguri arsye fiskale, duke konsideruar faktin që babai menaxhon fatet e sulmuesit të Barcelonës, përveçse është përfaqësuesi së bashku me vëllain Rodrigo.
SKENARË
Praktika pranë Komunës së Milanos ishte nisur më 6 qershor, në heshtje të madhe. Megjithatë, pas dy muajsh konteksti ka ndryshuar në mënyrë radikale. Në Barcelonë janë të bindur që "Pleshti" nuk do ta braktisë kurrë qytetin e tij adoptues, ndërsa në ambientet zikaltër qarkullon një energji e patrazuar nga deklaratat e kujdesshme të administratorit të deleguar Xhuzepe Marota. Frenimet fasadë, në fakt, nuk arrijnë të mbulojnë zërat e punimeve të nisura mbi të gjitha në Kinë: Tregues i parë është imazhi i projektuar i Mesit në "Duomon" e Milanos për të prezantuar sfidën e kaluar me Napolin. "Suning" po studion në mënyrë te thelluar termat ekonomikë të një operacioni që do të kujtonte atë që solli Kristiano Ronaldon te Juventusi. Nën këtë profil menaxherët e familjes Zhang po vlerësojnë impaktin ekonomik për sponsorët e interesuar (që nuk mungojnë) për këtë aventurë të kushtueshme, por joshëse.
DIALOGU
Në këtë periudhë, presidenti katalanas Bartomeu ka shpejtuar të deklarojë se Mesi do të mbyllë karrierën te Barcelona, sepse e ka premtuar dhe vetë ai në prag zgjedhjesh nuk do të mund t'ia lejonte vetes shitjen e ikonës së klubit, por nuk shpëton
fakti që kampioni argjentinas mbi argumentin nuk është shprehur ende. Sigurisht, është e vështirë që të lirohet gjatë kësaj merkatoje, meqenëse është i lidhur me një klauzolë prej 700 milionë eurosh dhe mund të largohet falas vetëm në fund të kontratës që skadon qershorin
e ardhshëm. Sistemi i taksave në Itali është në favor të zikaltërve: në Spanjë prej kohësh Mesi ka probleme të lidhura me këtë temë, ndërsa transferimi në Serinë A me ndihmën e Dekretit të Rritjes ul me 50% mbajtjet nga paga për ata që transferohen në Itali.