Egbo, kritika mesfushës dhe ndeshje brenda grupit

Në ditën e dytë të fazës përgatitore në Pogradec, Tirana ka kryer edhe seancën e dytë stërvitore me dy orare të ndryshme, në 08:00 dhe në 18:30. Stërvitja e mëngjesit ka qenë e lehtë për sa i përket aspektit fizik, e cila u dallua për disa ushtrime motivuese dhe zbavitëse. Ndryshe nga pardje, ku trajneri Egbo mblodhi ekipin në mes të fushës dhe mbajti një fjalim motivues, duke i kushtuar rëndësi të veçantë bashkëpunimit dhe lojës në grup, dje edhe për shkak të pranisë së skuadrës së Pogradecit, stafit teknik dhe disa tifozëve të pranishëm në stadium, ai u foli lojtarëve në dhomat e zhveshjes para seancës së dytë stërvitore. Seanca stërvitore nisi me disa vrapime të lehta rreth fushës dhe më pas u shtua intensiteti, ku lojtarët zhvilluan disa ushtrime stërvitore të zakonshme, por me intensitet të lartë. Dukej se vëmendja e Egbosë ishte te portierët Lika dhe Qirko, të cilët i stërviti personalisht, ndërsa pjesa tjetër e skuadrës u drejtua nga stafi teknik përreth 40 minuta. Diçka që bie në sy është edhe përfshirja në ekip e dy lojtarëve të U-19, Abazaj dhe Sefa, ndërkohë edhe e Stafës, i cili është angazhuar me ekipin e parë që prej janarit. Edhe këtë herë Egbo vendosi të organizojë një ndeshje kontrolli ku në të dyja formacionet kishte një miks lojtarësh, mes atyre të formacionit dhe lojtarëve rezervë apo të rinj në moshë. Edhe pse Egbo njihet si një trajner i qetë dhe ka zgjedhur pikërisht stilin motivues për të drejtuar këtë fazë, gjatë kësaj ndeshjeje nuk munguan sadopak disa kritika të tij për lojtarët e mesfushës. Seanca zgjati një orë e 30 minuta ku ra në sy edhe shfrytëzimi deri në limit i kohës deri në të errur (perëndim të diellit). Interesant është fakti se në fund të ndeshjes të kontrollit, lojtarët së bashku zhvendosën portat lëvizëse dhe i larguan nga fusha e blertë, duke ndihmuar edhe punëtorët e stadiumit. Në përfundim, trajneri kishte vendosur të mos fliste drejt lojtarëve, ku i la të lirë drejt hotelit ku ekipi është vendosur.