Takaj takon Shkëmbin, zbulohen prapaskenat
Presidenti kërkon trajner, korçari nuk bindet dhe në lojë janë Mirel Josa e Orges Shehi
Pas largimit të Ilir Dajës, presidenti i Skënderbeut, Ardjan Takaj, i ka ofruar pankinën e bardhekuqve ish-kapitenit të korçarëve për shumë vite, Bledi Shkëmbit. Një gjë të tillë e bëjnë me dije burime të sigurta në klubin bardhekuq që thanë se pasditen e së dielës palët janë takuar në kryeqytet për të arritur një akord. Ajo që e shtyu numrin një të klubit bardhekuq të shkonte drejt një alternative si Shkëmbi, për t'i besuar stolin bardhekuq, është pikërisht fakti që askush më mirë se ish-kapiteni i Skënderbeut nuk e njeh ambientin bardhekuq, është person i familjes që ka fituar shumë me këtë klub dhe mbi të gjitha një ikonë që kthehet në idhull për të rinjtë. Për këto arsye duket se për presidentin bardhekuq Shkëmbi ishte zgjedhja e parë. Takaj dhe Shkëmbi nga sa bëhet me dije, kanë biseduar për orë të tëra rreth një mundësie bashkëpunimi, për sezonin e ri dhe ngritjen e një Skënderbeu që sipas shumë mundësive do të jetë i përbërë nga lojtarë të rinj që duan të promovohen. Bisedimet kanë zgjatur për disa orë, por në fund nuk ka pasur asnjë marrëveshje mes palëve .
Bisedimet - Nga sa raportojnë burimet pranë klubit, dy palët janë takuar pasditen e së dielës dhe për disa orë kanë biseduar rreth ndërtimit të Skënderbeut për sezonin e ri. Sikundër bëhet me dije, kërkesat e Shkëmbit kanë qenë më se të qarta.
Tre lojtarë titullarë që të mbajnë peshën e ekipit dhe më pas lojtarë të rinj cilësorë për të plotësuar grupin, duke i ofruar ambicie dhe cilësi. Veç këtyre kërkesat e Shkëmbit kanë qenë të detajuara edhe për sa i përket stafit dhe objektivave sezonalë. Por duket se ideja e Takajt për të ndërtuar ekip "low cost" janë tejkaluar në kërkesat e Shkëmbit duke bërë që palët të mos bien dakord.
Mundësitë - Pas dështimit të një marrëveshjeje me Bledi Shkëmbin tashmë Takaj është në kërkim të timonierit të ri të Skënderbeut. Nuk përjashtohet fakti që të rikthehen sërish bisedimet me ish-kapitenin ndërsa për momentin duket se dy janë pistat të cilat numri një i klubit bardhekuq po i ndjek me përparësi. I pari është Mirel Josa që ka korrur sukses te Skënderbeu në të kaluarën dhe së dyti, Orges Shehi mund të shihet si një rikthim i mundshëm te bardhekuqtë.