Kampionati kombëtar shpall kampionët e ditës së parë
Pas Kupës së Shqipërisë të zhvilluar javën e kaluar, dje në stadiumin "Elbasan Arena" u zhvillua dita e parë e garave të kampionatit të 82-të kombëtar të atletikës për të rritur, event që do të vijojë edhe ditën e sotme. Në këtë aktivitet marrin pjesë 12 ekipe me 130 sportistë në total, 78 meshkuj dhe 52 femra. Në aktivitet garuan edhe atletët veteranë, për të cilët u ndanë edhe certifikata. Në përgjithësi garat ishin të qeta dhe duke marrë parasysh se edhe atletika u prek nga pandemia e "COVID-19", duke i privuar atletët edhe për kryerjen e seancave stërvitore. Ndërkohë, në ditën e parë u thyen edhe dy rekorde kombëtare për të rinj në kërcimin së gjati, me Heidi Valikajn që kërceu 7.38 metra dhe Erisa Rrasën me 5.90 metra.
REZULTATET Në kryeqytet u mbajtën garat e hedhjes së çekiçit dhe ato të shtizës. Respektivisht dy vendet e para në hedhjen e çekiçit i takuan Samuel Bishanakut të Dinamos dhe Emiliana Cikos së Tiranës. Shtizën e hodhën më shumë dy sportistët e Teutës, Ingri Nelaj dhe Marsela Luzi. Muhamet Çengeli i Vllaznisë u rendit i pari në kërcimin së gjati. Në 100 metra me pengesa, Melisa Sina e Partizanit e përshkoi më shpejt sesa vajzat e tjera. Florian Lata i Tiranës u tregua më i shpejtë në garat e 400 metrave me pengesa te meshkujt. Në 100 metra për vajza vendi i parë i takoi Paola Shyles së ekipit të Tiranës, ndërsa në garën e 800 metrave vendi i parë i takoi Relaksa Dautit po të Tiranës. Franko Burraj i Vllaznisë dhe Iliana Beqiri e Tiranës dolën të parët në garën e 400 metrave. Në kërcimin së larti në vend të parë dolën dy sportistët e Vllaznisë, Glenis Haxhia dhe Sara Malaj. Bruno Puqja i Besës zuri vendin e parë në garën e 3000 metrave për meshkuj, ndërsa në atë të 5000 metrave për femra e para doli Eigerta Pjetra e Tiranës. Vllaznia A për meshkuj dhe Tirana A për femra zunë vendin e parë në stafetën 4×100.
IZMIR SMAJLAJ
Ish-kampioni i Europës, Izmir Smajlaj, mungoi në garat e kampionatit kombëtar për shkak të një dëmtimi. Ditën e sotme atleti shkodran do t'i nënshtrohet një operacioni, me shpresën që të rikuperojë dëmtimin dhe të kthehet të garojë në nivele të larta. Për dëmtimin e tij foli edhe vetë kreu i FSHA-së, Gjergj Ruli. "Izmir Smajlaj do të operohet nesër (sot) dhe le të shpresojmë që çdo gjë do të shkojë mirë dhe sa më shpejt Izmiri të rehabilitohet për të filluar stërvitjen", u shpreh Ruli, i cili është gjithashtu trajneri i atletit shkodran.