Firmos Aldrit Oshafi, Largohet Arlind Kalaja
Teuta mbylli pushimet dhe nisi dje përgatitjet për sezonin e ri. Durrsakët duhet të përgatiten për Superioren, por më parë kanë ndeshjet europiane. Skuadra ka nisur punën nën urdhrat e stafit teknik të drejtuar nga Edi Martini dhe ndihmësi i tij Bledar Hodo. Pas matjeve fillestare, futbollistët të ndarë në grupe do të vijojnë ekzaminimet mjekësore dhe testimet e zakonshme për këtë fazë, ndërkohë që paralelisht do të punohet për realizimin e programit stërvitor. Kushtet janë ideale në Durrës, ku skuadra do të ketë mundësi të qëndrojë e bashkuar pas një periudhe më të gjatë. Atmosfera brenda grupit duket shumë pozitive, ku futbollistët u janë përgjigjur kërkesave të stafit teknik. Ekipi do të qëndrojë në Durrës deri të dielën, ndërsa pritet të vendoset nëse do të shkojë diku për një minifazë përgatitore, apo jo. LARGOHET KALAJA - Arlind Kalaja është futbollisti i parë i larguar nga Teuta. Lojtari shkodran sezonin e fundit nuk kishte hapësira të mjaftueshme dhe në bashkëpunim me klubin vendosi të largohet nga Teuta. Shkurtimisht për “Panorma Sport” Kalaja u shpreh: “Sapo kemi mbyllur marrëveshjen me Teutën, me mirëkuptim. Kam marrë lejen e kalimit dhe tashmë do të mendoj për ta vazhduar karrierën me një ekip tjetër. Çdo gjë është në rregull, thjesht shpreh respektin për drejtuesit dhe tifozët e Teutës. Për aq kohë sa kam qenë me këtë ekip, kam kaluar mirë. Nuk e di ende të ardhmen, sepse sapo jam larguar nga Teuta. Kam folur me menaxherin dhe të shohim çfarë do të bëjmë”.
VJEN OSHAFI - Teuta ka bërë dje edhe lëvizjen e parë në hyrje, duke afruar në skuadër sulmuesin 20-vjeçar Aldrit Oshafi. Ai ka qenë pjesë e Luftëtarit prej dy sezonesh, dhe duke parë moshën e re dhe cilësitë e tij, drejtuesit e Teutës kanë vendosur t’i ofrojnë një kontratë për katër vitet e ardhshme. Lojtari beratas është një element që premton. Merkatoja sapo ka nisur te durrsakët dhe në vazhdim priten të tjera lëvizje. Së pari, Teuta duhet të gjejë zëvendësuesin e Sherif Kallakut, pra duhet patjetër një mesfushor cilësor.