Nojer, bën presion: Bajerni im shkon në gjysmëfinale
“Po luajmë si skuadër, në Champions jemi të uritur”
Manuel Nojer edhe njëherë tjetër qëlloi në shenjë duke thënë para ndeshjes me Çelsin se nuk do të ketë surpriza dhe skuadra e Bajernit do të kualifikohej pa vështirësi për në fazën tjetër. Përfundimi? Kampionët e Gjermanisë edhe pse kishin fituar 3-0 në Londër, shënuan edhe 4 gola të tjerë duke u kualifikuar për në fazën çerekfinale me një rezultat mbresëlënës (7-1) ndaj skuadrës së Lampard. I ndodhur në Lagos, kapiteni i Bajernit është duke u stërvitur për sfidën e radhës, atë ndaj Barcelonës. Portieri gjerman nuk u trembet aspak katalanasve duke thënë se Bajerni ka ardhur në Portugali për të qëndruar shumë gjatë dhe kjo jo për të shijuar vetëm plazhin e bukur me pamje nga Oqeani Atlantik, por për të fituar Champions-in. “Nuk kisha asnjë dyshim që do të kalonim më tej. Skuadra është në formë dhe e uritur për të bërë gjëra të mëdha. Kjo u vërtetua edhe në duelin e dytë”, tha Nojer për gazetarët e ndodhur në qendrën stërvitore në Lagos të Portugalisë. “Duam të qëndrojmë sa më gjatë këtu dhe kjo jo vetëm për kohën e bukur. Sigurisht që mendja jonë është vetëm te ndeshja me Barcelonën. Ata janë një skuadër e madhe me lojtarë të mëdhenj. Por ne jemi Bajerni dhe kemi bërë një rrugë të gjatë për të ardhur këtu. Nuk ka qenë e lehtë, i gjithë sezoni nuk ka qenë i lehtë për askënd. Shoh një skuadër e cila stërvitet me kënaqësi dhe krenari. Humori është i mirë dhe para ndeshjeve të tilla është e
rëndësishme që atmosfera në skuadër të jetë pozitive. Kemi punuar mirë këto dy javë, jemi çlodhur dhe kemi gjetur sërish rimtin që kishim në kampionat”, tha kapiteni. Ky i fundit së bashku me shokun e skuadrës, Tomas Myler, e njohin mirë lojtarin më të rëndësishëm të Barçës, Lionel Mesin. Nga sfida direkte në ndeshjet e kaluara dhe nga finalja e Botërorit të “Brazil 2014”. Kujtojmë se gjermanët fituan 1-0 ndaj Argjentinës me golin e shënuar në kohën shtesë nga Mario Gëce.