Klubi: E padrejtë, do të ankohemi në Gjykatën Për të Drejtat e Njeriut

Skënderbeu, me anë të një postimi në faqen zyrtare në rrjetin social "Facebook", ka bërë me dije njoftimin e mbërritur në klub se dënimi mbetet në fuqi: 10 vite mospjesëmarrje në kompeticionet europiane dhe 1 milion euro gjobë. Klubi i Skënderbeut bën gjithashtu me dije se do të shfrytëzojë çdo mundësi ligjore për të kërkuar drejtësi në një tjetër hallkë: Gjykatën Europiane Për të Drejtat e Njeriut. "Më datë 12 gusht 2020, KF Skënderbeut iu bë me dije vendimi i Gjykatës Federale Zvicerane në lidhje me rekursin e kryer ndaj vendimit të KAS-it datë 12 korrik 2019. Pavarësisht argumenteve të pakundërshtueshme të paraqitura në proces, trupa gjykuese e përbërë nga 5 anëtarë, përmes një vendimmarrjeje me shumicë të thjeshtë votash, 3 vota pro dhe 2 kundra, vendosi rrëzimin e rekursit të kryer nga KF Skënderbeu, duke konfirmuar vendimin e mëparshëm të KAS-it. Në momentin aktual, KF Skënderbeu po shqyrton të gjitha mundësitë për një ankim të mëtejshëm në Gjykatën Europiane Për të Drejtat e Njeriut, pasi në asnjë mënyrë nuk mund të konformizohet me një vendim i cili në çmimin tonë cenon rëndë parimet e së drejtës për një proces të rregullt ligjor. Për këtë, informacione të mëtejshme në lidhje me përmbajtjen e vendimit në fjalë do të bëhen publike, pasi të jenë kryer të gjitha vlerësimet e rastit. Pavarësisht efekteve tejet të rënda që ky vendim ka, KF Skënderbeu do të vazhdojë rrugën e tij drejt arritjes sërish të sukseseve historike të mëparshme, të cilat ende sot shërbejnë si model e frymëzim për futbollin Shqiptar. Puna vazhdon!", ka njoftuar dy ditë më parë klubi korçar për vendimin drastik.