Kukësi blindon mbrojtjen me një boshnjak
Kenan Horiç, i gjatë 1.90, i bashkohet Obanorit në qendër të prapavijës për ekipin e Gegës
Kukësi nuk ndalet në merkato. Pas Bruno Telushit, verilindorët ditën e djeshme kanë zyrtarizuar një tjetër përforcim. Bëhet fjalë për mbrojtësin 30-vjeçar nga Bosnja, Kenan Horiç. Mbrojtësi shtatlartë ka firmosur për një sezon me skuadrën e Skënder Gegës, teksa ka një CV relativisht të pasur, pasi është aktivizuar me skuadra si Domzhale në Slloveni, Antaliaspor në Turqi e së fundmi ka qenë pjesë e Celik Zenicas në kampionatin boshnjak. Mbrojtësi - Me largimin e Olsi Teqjas dhe Gëzim Krasniqit, në skuadër u krijua vakuum pasi alternativat e vetme në qendër mbetën Obanor dhe Bruno Lulaj. Dy lojtarë të pamjaftueshëm në numër në këtë sektor. Kështu drejtuesit hynë në tratativa me disa futbollistë të tjerë në vend dhe rajon. Menjëherë sapo Kukësit ia ofruan Horiçin, trajneri Gega dhe drejtori Nexhipi e morën në konsideratë, pasi me CV-në, karakteristikat dhe eksperiencën që ka, ishte alternativa më e përshtatshme. Palët nuk humbën kohë dhe pasi ranë dakord për detajet, firmosën kontratën njëvjeçare. Horiç, së bashku me Obanor, pritet të krijojnë dyshen e qendrës. Të dy këta lojtarë janë shtatlartë dhe të fortë fizikisht (Obanor 1.94 m, Horiç 1.90 m). Lojtari, sapo firmosi kontratën në zyrat e klubit, është nisur së bashku me përfaqësuesin e tij dhe të klubit drejt Tropojës ku ekipi vijon fazën. Deklarata - Klubi lajmëroi me entuziazëm dhe për afrimin më të ri me anë të një deklarate për shtyp: "Zyrtare! Kenan Horiç është zyrtarisht futbollist i Kukësit! Mbrojtësi 30-vjeçar ka firmosur sot (dje) me skuadrën tonë kontratën për sezonin e ardhshëm. Mbrojtësi boshnjak ka luajtur për shumë vite në Europë, ku së fundmi ishte pjesë e skuadrës së Celik Zenicas në kampionatin boshnjak. Në të shkuarën, ai ka luajtur edhe në Slloveni me Domzhalen e në Turqi me Antaliasporin. Horiç ka firmosur sot (dje) kontratën, duke u bërë futbollisti më i ri i skuadrës sonë. Pa humbur kohë, Horiç do të niset drejt Tropojës dhe do të bashkohet me pjesën tjetër të skuadrës. Klubi i Kukësit i uron shumë suksese mesfushorit Horiç! Mirë se vjen Kenan Horiç", ka njoftuar dje zyra për shtyp e Kukësit. S.Sulozeqi