Tomori, Demo: Të hënën zgjedhim trajnerin e ri
"Do prezantojmë stafin e ri dhe shpalosim objektivat"
Pritjes te Tomori po i vjen fundi. Të hënën do të prezantohet zyrtarisht stafi i ri teknik i beratasve. Është vetë kryebashkiaku Ervin Demo që i shuan dilemat, më anë të një deklarate të dhënë ekskluzivisht për "Panorama Sport". Që pasi skuadra siguroi ngjitjen në Kategorinë e Parë, tifozët janë të interesuar që të zbulojnë projektin e klubit për sezonin 2020-2021. Ata presin një organizim perfekt dhe pse jo rikthimin në mesin e më të mirëve të futbollit shqiptar. "E kuptoj shqetësimin dhe faktin që tifozët beratas janë të paduruar në lidhje me riorganizimin e skuadrës për sezonin e ri. Dhe me të drejtë. Nëpërmjet gazetës suaj, dua t'i siguroj të gjithë qytetarët dhe sportdashësit e apasionuar të Tomorit, që të kenë durim deri të hënën. Do të jetë dita e parë e javës, kur do të bëhet prezantimi zyrtar i stafit të ri teknik dhe do të shpallen objektivat e klubit tonë për Kategorinë e Parë", u shpreh numri një i këtij institucioni. Kryebashkiaku lë të kuptohet se ekipi do të drejtohet nga një trajner i ri dhe jo më nga Kristaq Mile, i cili ishte ai që e ngjiti skuadrën në Kategorinë e Parë. Edhe pse vetë sportdashësit janë "pro" rikonfirmimit të tij, shanset janë zbehur ndjeshëm.
Sinella në "skenë" - Kandidatët për këtë post kanë filluar që të qarkullojnë prej ditësh në ambientet e klubit dhe në rrjetet sociale. Një nga emrat që ka
dalë në skenë është edhe ai i kavajasit Bledar Sinella, e megjithatë ende nuk mund të thuhet me siguri se sa kredite ka. Data 17 gusht do të zbardhë njëherë e mirë "timonierin" për kampionatin e ardhshëm, dhe mbi të gjitha, objektivat e ekipit në Kategorinë e Parë.