Pritje madhështore në Bergamo, Gjimshiti: Ishim kaq afër kalimit
Mbrojtësi i Kombëtares: E dhimbshme, krenar për çfarë bëmë
Pritje madhështore për Gjimshitin dhe shokët e skuadrës. Atalanta ia doli që të bëjë një paraqitje spektakolare në Ligën e Kampioneve dhe për këtë, tifozët bergamaskë e kanë pritur në shesh autobusin e ekipit në momentin e rikthimit nga Lisbona. Eliminimi me dy gola në minutat e kohës shtesë nga PSG, nuk e ka zbehur aspak entuziazmin e tifozërisë, e cila ka pritur ekipin dhe lojtarët si të ishin triumfatorët e këtij kompeticioni. Festë dhe kore për mbrojtësin e Kombëtares shqiptare dhe të gjithë ekipin nga tifozët dhe i gjithë qyteti i Bergamos. MBROJTËSI
Berat Gjimshiti nëpërmjet një postimi në profilin e tij zyrtar në "Instagram", ka komentuar rrugëtimin e Atalantës në Ligën e Kampioneve si dhe ka shprehur keqardhjen për mënyrën si janë eliminuar. Mbrojtësi shqiptar iu afrua shumë golit në minutën e 57-të, kur mund të kalonte ekipin e tij në avantazh, por nuk ia doli për t'ia bashkëngjitur edhe golin paraqitjes së shkëlqyer në mbrojtje. Në aq minuta sa qëndroi në fushë, ishte garanci për skuadrën bergamaske të drejtuar nga Gasperini dhe i pakalueshëm për parisienët. U desh një ndëshkim me karton të verdhë që t'i kushtonte atij zëvendësimin
në humbjen dramatike 2-1 ndaj PSG-së. Trajneri Gasperini e zëvendësoi, pasi shqiptari mori edhe dy paralajmërime nga gjyqtari si shenjë që i radhës mund të ishte edhe kartoni penalizues. Keqardhja
Në profilin e tij zyrtar në "Instagram", mbrojtësi shkruan: "Është e dhimbshme të largohesh në këtë mënyrë. Ishim kaq afër kualifikimit, vetëm për pak minuta. Megjithatë, ndihem krenar për atë që arritëm si ekip. Faleminderit të gjithëve që na mbështetën këtë sezon dhe shihemi sezonin tjetër", ka shkruar mbrojtësi i Kombëtares, i cili është një prej lojtarëve bazë të suksesit të Atalantës këtë sezon, si në kualifikimin historik në çerekfinale të Ligës së Kampioneve (sezoni debutues) ashtu edhe për paraqitjen në Serinë A, teksa bergamaskët për të dytin sezon radhazi konfirmohen mes katër më mirave.