“Përralla” Lajpcig vazhdon në gjysmëfinale, Atletiko në shtëpi
Gjermanët bëjnë surprizën e madhe në Lisbonë, tani i pret PSG-ja
Në xhiron e 24 orëve, “përralla” e Atalantës ofroi një fund të hidhur, me PSG-në që e përmbyste me dy gola, në minutat 90 dhe 93, me Berat Gjimshitin me shokë që humbën kështu mundësinë e “titullit” të skuadrës së çmendur dhe surprizë të këtij sezoni të Champions-it. Por ndërkohë ky vlerësim nuk do të mbetet pa pronar, pasi me të drejtë mbrëmjen e djeshme e meritoi Lajpcigu, i cili trondit rëndë themelet e Atletikos së Madridit, duke e dërguar në shtëpi në mënyrë të papritur “bandën” e Diego Pablo Simeones. Në Lisbonë, çerekfinalja e dytë e turneut përfundon 2-1 për gjermanët, të cilët meritojnë me të drejtë të luajnë mundësinë për të qenë në finalen e 23 gushtit, kundër PSG-së. Skuadra e trajnerit “adoleshent”, Julian Nagelsman (vetëm 33 vjeç), trembet vetëm pas zbritjes në fushë të Zhoao Feliks, por as talenti portugez, pas fitimit të penalltisë dhe shndërrimit të saj në gol, nuk arriti që të prishë një ndër kapitujt më të bukur të historisë së futbollit, duke kujtuar se Lajpcigu është një skuadër e formuar vetëm në vitin 2009 dhe pas 11 vitesh, shkon pa presion ndaj PSGsë, për të tentuar atë që çdo klub dhe çdo futbollist ëndërron të luajë, finalen e Ligës së Kampioneve. NDESHJA – Nuk ishte një çudi që Lajpcigu i udhëheqësit “adoleshent”, Nagelsman, është i mbushur me talent, por ajo që mahniti mbrëmjen e djeshme është se arriti të bëjë një tjetër mrekulli, edhe pa yllin e saj, Timo Verner, i cili braktisi skuadrën përpara
kohe, pas firmës me Çelsin. Ndonëse, pas natës së djeshme portugeze, ish-sulmuesi do e ketë kuptuar fort mirë gabimin e bërë... Gjithsesi, ky Lajpcig i ka tashmë liderët dhe mbi ata vazhdon që të ndërtojë kolonat e suksesit, pasi futbollistë si Upameçano e Sabitzer janë të destinuar
për një merkato të nxehtë dhe të mbushur me miliona të frikshëm... Dhe gjermanët e tregojnë që në fillim se nuk kishin zbarkuar në Lisbonë për të bërë shaka, përkundrazi, vendosin menjëherë ligjin përballë Atletikos, që kujtojmë se erdhi deri në çerekfinale, pasi eliminoi kampionët
në fuqi të Liverpulit. Vërtet “banda” aktuale e Simeones nuk është ajo që luajti (dhe i humbi) dy finale, por edhe që të kapeshin në befasi si mbrëmë nga gjermanët, nuk pritej. Nëse pjesa e parë përfundoi pa gola, në të dytën, Sabitzer dhe Olmo nuk vonojnë që të gjejnë avantazhin: krosim
nga e djathta e zonës dhe goditje fatale me kokë për portierin Oblak. 1-0 për Lajpcigun në të 51ën dhe Simeone hedh menjëherë në fushë Zhoao Feliksin, i cili shpërblen trajnerin e tij. Në të 71-ën, asi portugez fiton penallti dhe e dërgon saktë në rrjetë. Por nëse ky gol barazimi u duk sikur riktheu në lojë Atletikon, dy minuta nga fundi, kur të gjithë mendonin për shtesat, një goditje nga distanca e Adams, e karamboluar në gjurin e Saviçit përfundon në rrjetë, duke mposhtur një Oblak të pafat. Dhe kaq mjafton që Lajpcigu të vazhdojë të ëndërrojë me Champions-in në sfond, ndërsa Atletiko duhet të ripaketojë valixhet, më shpejt sesa mendohej...