Andrea Pirlo takohet me klubin, Ronaldo dhe Dibala në pikëpyetje

Kampionët e Italisë bëjnë gati strategjinë për merkaton

Juventusi nuk kërkon të humbasë kohë dhe ka nisur menjëherë nga puna, duke projektuar sezonin e ardhshëm. Trajneri Andrea Pirlo ka zhvilluar edhe mbledhjen e parë operative me Fabio Paratiçin, përgjegjësin e zonës sportive. Ky takim si rend dite ka pasur plotësimin e stafit, ku tashmë pritet të zyrtarizohet Aurelio Andreacoli si ndihmëstrajner, i cili ka ndërprerë kontratën që e lidhte edhe për një tjetër sezon me Xhenoan. Stafit do t’i bashkohet edhe Robeto Baronio. Por sigurisht që në këtë mbledhje janë diskutuar edhe idetë mbi merkaton e kampionëve të Italisë. STRATEGJIA - Gjatë orëve të fundit është folur shumë për të ardhmen e Paulo Dibalës, ndërsa në krahun tjetër duket se Mendes i ka shuar disi zërat për një largim të Ronaldos nga Torino. Gjithashtu temë diskutimi është edhe pasardhësi i sulmuesit Gonzalo Higuain, me argjentinasin që duket se e ka të sigurt largimin nga bardhezinjtë. Momentalisht emrat që qarkullojnë janë: Milik, Xheko dhe Morata. Jemi vetëm në ditët e para të punës, por duket interesante se cilat do të jenë hapat e parë konkretë që do të bëhen në merkato. Nuk është më mister që Pirlo në eksperiencën e tij të re mund të mbështetet direkt te personi kryesor që e ka sponsorizuar për stolin bardhezi, te presidenti Andrea Anjeli. Kështu që priten shumë risi, duke pasur parasysh që strategjia e përforcimit bazohet në ndryshime të shumta në skuadër, që do të thotë se nga Juventusi pritet të ketë edhe largime të dhimbshme. Për këtë gjë e gjithë vëmendja është e përqendruar tek e ardhmja e Dibalës dhe e Ronaldos. A.LLESHAJ