Muçi, në skenë del Jang Bojsi
Lokomotiva e Zagrebit pranë blerjes së Ismajlgecit, ja prapaskenat me mbrojtësin
Ernest Muçi mund të kalojë te Jang Bojsi ose të paktën kështu përflitet në ambientin bardheblu. Burime të pakonfirmuara zyrtarisht bëjnë me dije se lojtari i sulmit është pëlqyer nga drejtuesit e skuadrës së Jang Bojsit. Thuhet se Tiranës për lojtarin i janë afruar rreth 600 mijë euro. Një shumë e madhe, në krahasim me të gjithë ofertat që u kanë ardhur bardhebluve në tavolinë. Si fillim, nuk dihet nëse shuma është e saktë, ndërsa nga ana tjetër Tirana nuk ka vendosur nëse do ta shesë apo jo futbollistin bardheblu. Fakt është që Tirana nëse shet lojtarin, do të mbetet pa sulmues. Albion Avdijaj është transferuar në tribunë ndeshjen e fundit me Jang Bojsin dhe nuk është grumbulluar as në 18-shen zyrtare. Kjo do të thotë se nuk është në planet e Tiranës. Derrik Sasraku nuk dihet se në çfarë gjendjeje është dhe në këtë prizëm, bardheblutë nëse shesin lojtarin, mund të humbasin shumë dhe do të përballen me një repart të boshatisur.
SULMUESI - Ernesti me pak minuta ka ditur të shënojë golat e tij, madje duke qenë golashënues në derbi, ashtu si Kordeiro në krahun tjetër. Në ndeshjet e Europës ka shkëlqyer. Nuk ka shënuar, por paraqitja në sfidën me serbët i ka çuar kuotat në 500600
mijë euro për kartonin. Skuadrat që e duan janë disa. Ndoshta në fund do të ketë një largim për një aventurë europiane. Le të shohim...
KONTRATA - Tirana dhe përfaqësuesi i Ernest Muçit prej ditësh kanë diskutuar për kontratën e re të sulmuesit bardheblu. Për momentin
gjithçka ka mbetur në vend, pasi dy palët do të presin për ndonjë marrëveshje deri në fund të merkatos. Pra, nëse do të ketë një shitje të Ernestit në një nga skuadrat që paguan më shumë për kartonin e tij dhe që plotëson dëshirat e të gjitha palëve në lojë. Nëse një gjë e tillë nuk ndodh, atëherë
do të ketë një marrëveshje. Gjithsesi, për momentin palët janë duke diskutuar. Muçi, edhe pse është titullari i skuadrës, ka edhe një vit kontratë me Tiranën. Nëse nuk rinovon, mund të largohet me parametër zero. Ama flasim për një të ardhme, sepse tani sulmuesi është pa dyshim titullari i skuadrës bardheblu në repartin e avancuar dhe prej tij priten golat e mëdhenj.
ISMAJLGECI - Një tjetër lojtar në orbitën e merkatos është edhe Marsel Ismajlgeci. Mbrojtësi i krahut të majtë, me sa duket, pëlqehet në Kroaci. Ai mund të firmosë këto ditë me Lokomotivën e Zagrebit, skuadrën që ka në grup disa shqiptarë të tjerë. Me sa është kuptuar, Lokomotiva mund ta blejë shqiptarin, por nuk do ta marrë menjëherë në ekip. Ai do të bashkohet me kroatët ndoshta në janar apo në qershor, duke luajtur një sezon të plotë si titullar. Shuma e menduar e shitjes është të paktën 150 mijë euro. Lokomotiva ka tentuar edhe lojtarë të tjerë te Tirana, siç është Jurgen Çelhaka, por nuk ka pasur marrëveshje. Nëse Ismajlgeci firmos me Lokomotivën, ai do të jetë shqiptari i radhës që bashkohet me ekipin kroat.