Partizani, Daja terapi sulmit
Braziliani Melo mungon në stërvitje, katër lojtarë përgatiten të diferencuar nga grupi
Partizani rikthehet të stërvitet në Elbasan, në "shtëpinë" e tij pranë kompleksit "Pepa". Trajneri Ilir Daja preferon një fushë me bar natyral, për t'iu përshtatur në njëfarë mënyre edhe ndeshjeve të kampionatit. Situata në kampin e kuq duket e qetë dhe tekniku kryeqytetas po përpiqet që të nxjerrë maksimumin nga kontigjenti që ka në dispozicion, duke provuar manovra dhe "terapi ekstra" për të marrë më të mirën nga të tijtë.
PROBLEMET - Përveç kapitenit Alban Hoxha, i cili është i grumbulluar me Kombëtaren, në seancën e djeshme stërvitore mungoi edhe mesfushori brazilian, Melo, i cili vijon të ketë probleme shëndetësore. Ndërkohë, Esin Hakaj dhe Lukas Kardozo nuk u bashkuan me ekipin dhe kryen stërvitje të diferencuar duke bërë vrapime përreth fushës, ashtu si edhe sulmuesi i ri, Franc Marinaj. Sakaq, në fund të seancës stërvitore edhe sulmuesi Brajan Braun shfaqi shqetësime në këmbë dhe mori shërbimin e stafit mjekësor, por që nuk flitet për ndonjë dëmtim serioz. MANOVRAT - Për të gjetur "formulën" ideale në skuadrën që drejton, Daja është duke provuar shumë lëvizje në ndeshjet dhe për
gatitjet që bën brenda grupit, madje edhe duke përshtatur lojtarët në role të ndryshme. Erald Çinari një herë u provua si mbrojtës i majtë dhe më pas si një pykë i mirëfilltë, për ta parë ku mund ta përshtatë kur të nisin ndeshjet zyrtare. Ndërkaq,
edhe Asani provoi shpesh ndërrimin e krahëve, sa në të majtë edhe në të djathtë. Sa u përket titullarëve, as vetë Daja nuk është i qartë 100 për qind dhe në kokën e tij ka shumë dilema që duhet të shuhen para se të nisë sezoni. Edhe në seancën e
djeshme stërvitore tekniku i ngatërroi kartat, duke mos lënë të kuptohet asgjë rreth të preferuarve të tij.
TERAPIA - Duket se një nga "hallet" më të mëdha të Dajës është gjetja e golit, ndaj po bën të pamundurën që t'i çojë drejt rrjetës sulmuesit e
tij. Pasi u mbyll stërvitja, ai "urdhëroi" lojtarët e ofensivës, nga të cilët pret të zgjidhin edhe ndeshjen, që të mos zhvishen me pjesën tjetër të grupit, por të vazhdojnë stërvitjen. Kështu, Cara, Solomon, Bardhi, Çinari dhe Mala prisnin krosimet
e Idrizajt dhe Ballës. Aq rëndësi i kushtoi Daja këtij ushtrimi vetëm me këta futbollistë, saqë preferoi të qëndronte aty deri në fund. Për më shumë se 20 minuta futbollistët provuan me radhë të godisnin portën pas krosimeve nga krahët.