Interi e mbylli me Darmianin, Eriksen refuzoi Dortmundin
Mbrojtësi transferohet nga Parma, zgjedh numrin 36
Mateo Darmian është më në fund, nga dje, një lojtar i Interit. Është mbyllur pra me sukses historia e gjatë e merkatos. Mbrojtësi me vitlindje 1989, në fakt, ishte përcaktuar prej kohësh me klubin zikaltër, madje që nga viti i kaluar, kur Darmian iu bashkua Parmës. Në atë rast, Interi u zotua se do ta merrte në një tjetër moment nga klubi verdheblu. Zyrtarizimi ka ardhur në ditën e fundit të merkatos, me zikaltrit që afruan kështu futbollistin në huazim (për 2,5 milionë euro) me detyrim blerjeje. Rreth orës 09:00 ndodhej në klinikën “Humanitas” për të kryer pjesën e parë të vizitave mjekësore, të ndjekura nga kalimi klasik në CONI për të mbërritur në selinë interiste në pasdite për firmën në kontratën e re, nga e cila do të përfitojë 2 milionë euro. Për eksperiencën e re, Darmian ka zgjedhur numrin 36.
ERIKSEN – Ndërkohë, në qendër të zërave të merkatos ditën e djeshme ishte edhe Kristian Eriksen. Ashtu si pjesa më e madhe e skuadrës, edhe talenti danez ndodhej në listën e shitjeve të drejtuesve zikaltër (pavarësisht afrimit në skuadër vetëm janarin e kaluar me statusin e yllit) dhe në ditën e fundit të seksionit veror kanë ardhur edhe ofertat. Pas zërave të një interesimi të Hertës së Berlinit,
u përpoq gjatë orëve të fundit përpara mbylljes edhe Borusia e Dortmundit. Përgjigjja e Interit, megjithatë, nuk ka vonuar: një “jo” e prerë, pasi klubet e Bundesligës ishin ofruar ta transferonin mesfushorin në huazim, një formulë jo e pëlqyer nga zikaltrit.
NAINGOLAN - Një tjetër lajm ishte interesimi po i Hertës së Berlinit, por për Raxha Naingolanin. Në teori belgu i ishte premtuar Kaljarit, me të cilin Interi nuk ka arritur të gjejë një akord ekonomik, pavarësisht bisedimeve që zgjasnin prej kohësh. Dhe pikërisht për arsyet e
fundit gjermanët ishin përpjekur të hidheshin në sulm për mesfushorin, duke ofruar 10 milionë euro, por zikaltrit kanë refuzuar shifrën dhe lojtari destinacionin. Kështu, situata është mbyllur me opsionin e dytë: Naingolan do të qëndrojë, së paku edhe këtë sezon, në Milano.