Junajtid sprova të lodhshme për Dembele, vjen vetëm Dialo
Akord me talentin e Atalantës, por ai vjen në janar
Mançester Junajtid ishte klubi që mbajti gjallë ditën e fundit të merkatos në Angli. Gjatë ditës së fundit të transferimeve ndërkombëtare, “Djajtë” negociuan me Barcelonën për transferimin e Osman Dembelesë në “Old Trafford”, por gjithçka përfundoi pa sukses dhe francezi qëndroi në “Camp Nou”. Bisedimet nisën dhe u ndërprenë disa herë, pavarësisht se katalanasit e zbutën qëndrimin e tyre për shitjen përfundimtare të sulmuesit. Junajtid ishte i interesuar për një marrëveshje vetëm në formë huazimi për 23vjeçarin, ndërsa spanjollët dëshironin shitjen e tij. Si pasojë nuk u arrit një marrëveshje dhe palët hoqën përfundimisht dorë nga bisedimet në orët e fundit të mbylljes së merkatos. Solskjaer e donte me çdo kusht një sulmues krahu pas dështimit për të transferuar preferencën e tij të parë, Xhejdën Sançon, nga Dortmundi dhe anglezët ishin gati për ta transferuar Dembelenë edhe pa i kaluar vizitat mjekësore nëse nuk do të kishte kohë. Dembele nuk u aktivizua në ndeshjen e fundit të Barçës kundër Sevijes dhe mungoi edhe në stërvitjen e djeshme. Gjatë ditës, “Djajtë” negociuan edhe me Uotfordin për transferimin e Ismaila Sarrit, por përpjekjet e tyre u përqendruan te Dembele, e ardhmja e të cilit varej shumë edhe prej fatit të transferimit të Memfis Depajit te Barcelona, i cili gjithashtu dështoi. Megjithatë, një sulmues krahu Solskjaer e ka transferuar, edhe pse ai do të vihet nën urdhrat e tij vetëm gjatë muajit janar. Bëhet fjalë për talentin 18-vjeçar të Atalantës, Amad Dialo, për të cilin është arritur akordi për 30 milionë euro (27.2 milionë paund) plus bonuset. Dialo debutoi në Serinë A sezonin e shkuar dhe ishte pjesë e skuadrës italiane në çerekfinalen e Championsit kundër PSG-SË. Junajtid e ka kërkuar atë gjatë kësaj vere dhe vendosi vetëm ditën e fundit që të rihapte bisedimet. Dialo, i cili ka luajtur në Serinë
A vetëm 30 minuta, ishte edhe pranë Parmës, por marrëveshja nuk u finalizua. Junajtid nuk e kishte me nxitim transferimin e menjëhershëm të lojtarit nga Bregu i Fildishtë, duke qenë se ai do duhet të pajisej me leje pune që transferimi të mbyllej menjëherë.