Eksperiment i Spanjës, CR7 ngecet në shtyllë
Ronaldo dhe Sançes tronditin Kepën, Adama luan si bishë
Nëse Kristiano Ronaldo do të kish te veshur fanellën e Spanjës, me siguri këta të fundit do ta kishin fituar ndeshjen, por ja që ai ishte kundërshtar dhe sfida përfundoi në barazim 0-0. Vetë CR7 u bë protagonist me një traversë, ndërsa eksperimenti i Spanjës shkoi deri diku pozitivisht sepse Enrike u besoi të rinjve. Por, kësaj skuadre i mungon një sulmues dhe kjo është e qartë.
LUAN RONALDO - Kristiano Ronaldo nuk dëshiron të humbasë asnjë moment për të bërë histori me kombëtaren e tij. Sulmuesi portugez luajti dje si titullar kundër Spanjës, ndërsa këta të fundit kishin shumë rrotacion dhe fytyra të reja. Enrike kishte lënë jashtë kapitenin Serxho Ramos, por edhe talentin Ansu Fati. Ai u kishte dhënë besim disa lojtarëve të rinj dhe ruajti forcat për ndeshjen zyrtare për Ligën e Kombeve. Ditën e djeshme mungoi takimi mes Ronaldos dhe Ramosit, të cilët për herë të fundit ishin takuar në Botërorin e vitit 2018 kur shkëmbyen stemat përpara ndeshjes në Rusi.
RITËM PA GOLA - Pjesa e parë mbyllet me rrjeta të paprekura. Spanja paraqitet mjaft mirë duke bërë presion te kundërshtari dhe duke dominuar duelet një kundër një. Kjo freski e lejoi që të fitonte terren dhe të krijonte disa raste. Megjithatë, ato nuk ishin të pastra, por thjesht disa tentativa nga larg, që nuk e surprizuan portierin Rui Patrisio. Spanja filloi të ndiente lodhje dhe në fundin e pjesës së parë ishte Portugalia që mori kontrollin duke tentuar të shënonte. Kristiano Ronaldo tentoi me kokë, por nuk gjeti dot portën.
CR7 I PAFAT - Të dy trajnerët bëjnë zëvendësimet e para dhe Portugalia e nis më mirë fraksionin e dytë të lojës.
Kristiano Ronaldo ka më shumë lirshmëri dhe fillon të dalë në skenë. Bëhet protagonist në dy rastet e rrezikshme të luzitanëve. Fillimisht lëshon një predhë me të majtën, e cila ndalet në shtyllë dhe topi shkon në vijën fatale. Pastaj jep një pasim me klas për Renato
Sançesin, që godet traversën.
FUTET “BISHA” - Trajneri Luis Enrike ia dhuron emocionet e debutimit me skuadrën e parë “bishës” Adama Traore, i cili ka impakt dhe ndikon në lojën e Spanjës. Në krahun e djathtë fiton thuajse çdo duel me kundërshtarët dhe krijon
raste të rrezikshme. Pasimi për Olmon ishte spektakolar pas një avancimi në vijën fatale, por portieri Patrisio e ndali. Në minutat e fundit Spanja shpëton mirë pasi goditja e Diogo Zhotës devijohet dhe nga këndi, Zhoao Feliks gabon vetëm pak centimetra larg vijës fatale.