Ronaldo me “COVID”, në rrezik sfida me Mesin
Sulmuesi në izolim, mund të humbasë 4 ndeshje me Juven
Kristiano Ronaldo pozitiv me Ko ronavirus. Lajmi vjen përmes një komunikimi të Federatës Portugeze të Futbollit, ku mbrëmjen e së hënës sulmuesi i Juventusit bëri një tampon i cili jepte një rezultat të dyshimtë. Testi i dytë e konfirmoi pozitiv. Ai është asimptomatik dhe është futur menjëherë në izolim. Kapiteni i Portugalisë do të humbasë kështu ndeshjen e sotme të Ligës së Kombeve kundër Suedisë.
NË RRJETET SOCIALE – Ditën e hënë, CR7 postonte një foto gjatë darkës me të gjithë shokët e kombëtares, në një tavolinë me distancim zero dhe pa maska. Dy futbollistë të tjerë të luzitanëve, Zhoze Fonte dhe Antoni Lopez kishin rezultuar pozitivë gjatë ditëve të fundit. Ndërkohë që mediat spanjolle janë të shqetësuara për lojtarët e tyre të kombëtares pas fotos së famshme të Ronaldos me Pepen dhe kapitenin Serxho Ramos në fund të ndeshjes me Spanjën pak ditë më parë.
PLANI – Sipas rregullave, Ronaldo duhet të qëndrojë në Portugali të paktën deri në fund të javës. Testin e radhës ai nuk mund ta bëjë më herët se pesë ditë. Vetëm në atë pikë, në rast se do të konfirmohet negativ, ai mund të shqyrtojë mundësinë e rikthimit në Itali.
JUVE NË TELASHE – Një problem për Juven në pritje të katër ndeshjeve të rëndësishme në dy javët e ardhshme: transferta në Krotonte, debutimi në Champions kundër Dinamos së Kievit dhe pastaj Verona dhe Barcelona në shtëpi. E pamundur që 35vjeçarin ta shohim në Itali 10 ditëshin e ardhshëm. Prezenca ndaj Krotones është përjashtuar, ashtu si ajo në Kiev. Pikëpyetja e madhe përveç Juve-verona është nëse do të jetë në Juve-barça, ndeshja e parë kundër Mesit në fazën e grupeve të Champions-it. Infektimi i Kristianos risjell në vëmendje vendimin e tij për të lënë “Kontinasën” të hënën në 5 tetor, pak orë pas ndeshjes së paluajtur kundër Napolit. Ai ishte më i vendosuri mes juventinëve për të lënë Italinë, pavarësisht detyrimit për të qëndruar në izolimin e sigurt të “Kontinasës” dhe respektuar rregullin italian, për të cilin ai protestoi edhe përpara skuadrës. Prokuroria e Torinos hapi një hetim dhe ai rrezikon të paguajë edhe pasojat e shkeljes së
nenit 650 të kodit penal.
MESAZHI I XHORXHINËS – E fejuara e sulmuesit bëri një postim në “Instagram” në mbështetje të tij: “Je frymëzimi im”, shkruante modelja. Ndërsa mamaja Dolores shkruante: “Zoti u jep beteja të mëdha luftëtarëve të
mëdhenj”. Lapo Elkan shfrytëzoi “Twitter”-in për t’i dërguar një mesazh mikut të tij: “Je një luftëtar i vërtetë dhe jam përkrah teje në këtë koment të vështirë. Një përqafim i madh miku im. Shërohu shpejt sepse ne presim rikthimin e mbretit”.