Inter-milan, një derbi botëror që streson trajnerët
Dy kroatët duan të jenë protagonistë, dinë si ndëshkohet "Djalli"
Nga lojtarë me valixhe në duar, në rezerva, e tani në titullarë në sfidën që ndez Milanon. Marselo Brozoviç dhe Ivan Perisiç fitojnë një vend në derbi, me ndihmën e "COVID"-IT që nxori jashtë loje Galjardinin dhe Jangun, por mbi të gjitha me atë ndjesi prej të padëshiruarish që i shoqëron prej kohësh. E megjithatë, po flasim për dy kolona të Kroacisë nën kampione të botës, për një dyshe që ka ndëshkuar Milanin në mënyra të ndryshme.
BROZO - I transferuar nga Dinamoja e Zagrebit në janarin e 2015-ës, Brozoviç tri vite më pas ndodhej në një aeroplan drejt Sevijes, por Spaleti e bën të zbresë sepse nuk afrohet Pastore dhe kroati nevojitet. Brozo, që më përpara luante fantazist, bën kthesën e karrierës kur vendoset "regjisor": jo rastësisht verën e kaluar ishte i vetmi titullar i mbijetuar i revolucionit të Kontes në mesfushë. Statistikat paguajnë, meqenëse është zikaltri që shërben më shumë asiste (9, po aq sa Sançez), fiton më shumë dyluftime (95) dhe rikuperon më shumë topa (272). Ndërkohë që është në absolut mesfushori me numrin më të madh të pasimeve të sakta në katër sezonet e fundit: 6856. Shifra që peshojnë më shumë se dy golat vendimtarë të shënuar Milanit në derbet e fituara sezonin
e kaluar. Mund të shitej për të siguruar paratë për Kantenë, por qëndroi dhe tani kërkon shansin. PERISIÇ - Ndërsa miku dhe bashkëkombësi Ivan Perisiç vitin e kaluar ndodhej në Bavari duke mbushur kurrikulumin me trofe te Bajerni i Mynihut. I larguar së bashku me Ikardin dhe Naingolanin si "rebel", u rikthye
në Milano me përulësi të madhe. Në skemën 3-5-2 të Kontes mund të gjejë hapësirë vetëm duke mbuluar korsinë e majtë. Në lojën e çifteve, megjithatë, tani është e vështirë ta vendosësh me Hakimin, edhe ai më i prirur për të avancuar. Por Konte të shtunën i ka zgjedhjet e detyruara. Megjithatë, Ivani është
treguar "i Tmerrshëm" në derbe të ndryshme: ka firmosur në të 92ën golin e barazimit 2-2 (të parin për Piolin interist, sot në stolin kuqezi) në nëntorin e 2016-ës. Pa harruar asistet: 3 në derbe. Dhe vetëm Handanoviç (15) mes zikatërve sot ka luajtur më shumë sfida brenda qytetit sesa kroati: 8.