Azerbajxhani vetëm barazim, De Biazi: Emocione në Elbasan
Azerbajxhani nuk ka shkuar më shumë se një barazim pa gola ndaj Qipros në ndeshjen e luajtur dje në "Elbasan Arena" për Ligën e Kombeve. Situata e jashtëzakonshme në shtetin Azer prej luftës me Armeninë për territorin e Karabkut, detyroi Federatën e Azerbajxhanit të priste Qipron në një fushë neutrale dhe pikërisht në Elbasan. Azerët drejtohen prej pak muajsh nga ishtrajneri i Shqipërisë, Xhani de Biazi. Prania e tij në Elbasan e bënte edhe më të veçantë këtë takim. Skuadra e italo-shqiptarit ishte më lart se kundërshtari, por nuk arriti të shfrytëzonte rastet. Më flagranti ishte ai i penalltisë së humbur nga kapiteni Garajev në minutën e 27-të. Gjithashtu, edhe sulmuesi Shejdajev shpërdoroi dy mundësi të arta, i vetëm me portierin qipriot. DEKLARATA E TRAJNERIT
Pas ndeshjes, De Biazi foli për "Panorama Sport", duke shprehur keqardhje për barazimin. "Ishte një ndeshje që duhet ta kishim fituar. Provuam që ta bënim këtë dhe krijuam disa raste, në të dyja pjesët, sidomos në të parën. Në fakt nuk ia dolëm ta realizojmë, edhe pse skuadra ka dhënë shpirtin në fushë. Për mua ky barazim ishte me dy pikë të humbura. Jam shumë i zhgënjyer, pasi shpresoja që skuadra të konkretizonte rastet", deklaroi fillimisht De Biazi. I pyetur se si ishte të kthehej në Elbasan, por jo si trajner i Shqipërisë, ai u shpreh: "Isha krejtësisht i përqendruar te ndeshja, sepse doja të merrnim 3 pikë, për të rritur sadopak shpresat që të mund të kishim një fund tjetër në renditjen e këtij grupi. Sigurisht që është bukur të rikthehem në Elbasan. Kemi mundur Francën dhe Armeninë këtu. Kemi bërë shumë fitore dhe janë emocione pozitive. Kisha emocione, por isha shumë i përqendruar te ndeshja me skuadrën time, Azerbajxhanin, për të marrë maksimumin". I ngacmuar për faktin se sot bëhen gjashtë vite nga ndeshja e pezulluar në Beograd, ai shtoi: "E kujtoj që këtë të hënë ishte 5-vjetori nga kualifikimi historik në Europian, me fitoren 0-3 në Armeni. Kur humb nuk kujtoj më asgjë, më fshihen menjëherë gjërat". VLADIMIR MEMA