Vendimet e plota që FSHB mori më datë 12 tetor
Federata Shqiptare e Basketbollit ka zbardhur të gjitha vendimet e marra në mbledhjen që Komiteti Drejtues zhvilloi dy ditë më parë. Ja njoftimi i plotë i FSHB-SË:
"Më datë 12 tetor 2020, në drejtimin e presidentit, z. Ponari dhe anëtarëve të pranishëm, z. Shaka, z. Taflaj, z. Jarani u mbajt mbledhja e radhës e Kd-së, e cila diskutoi rreth rendit të ditës si më poshtë:
1. Miratimi i ndryshimeve të rregullores së aktiviteteve 2020-2021.
2. Konfirmimet e deritanishme për pjesëmarrje në Ligën Unike.
3. Informacion mbi aktivitetin ndërkombëtar meshkuj/femra - ndeshjet e nëntorit 2020 .
4. Konfirmimet për pjesëmarrje në kampionatet europiane të moshave U-20, U-18, U-16 djem/vajza.
5. Të ndryshme.
Kd-ja vendosi:
Referuar pikës së parë të rendit të ditës, mbi ndryshimet në rregulloren e aktiviteteve të FSHB-SË, fillimisht vendoset data 25 tetor 2020, si afati i fundit për dërgim të dokumentacionit për regjistrim (pas dërgimit të materialeve të sezonit 2020-'21 nga administrata). Data e fillimit të kampionatit, vendoset, data 1 nëntor 2020 (çdo datë e fillimit të aktivitetit është objekt ndryshimi në varësi të vendimeve dhe udhëzimeve të autoriteteve shëndetësore dhe qeveritare). Për shkak të nisjes së aktivitetit ndërkombëtar, ishte e domosdoshme të ndryshohej data e paracaktuar 15 nëntor 2020. Lidhur me ndryshime të tjera të rregullores së aktiviteteve, në materialin e dërguar do të gjeni specifikisht me ngjyrë të verdhë, të gjitha ndryshimet e miratuara nga Kd-ja dhe që hyjnë në fuqi menjëherë pas shpërndarjes së saj në mënyrë zyrtare. U vendos që Superkupa e Shqipërisë 2019-2020, meshkuj e femra do të luhet duke qenë se ekipet janë të përcaktuara, data dhe vendi do të përcaktohen me vendim të Kd-së. Superkupa e Shqipërisë 2020-'21 NUK do të zhvillohet si për meshkuj e për femra, për arsye të mungesës së kampionëve kombëtar për edicionin 2019-'20.
Lidhur me pikën e dytë të rendit të ditës, u vendos që të komunikohet me ekipet që nuk kanë konfirmuar për të përfunduar dhe zyrtarizuar pjesëmarrjen në Ligën Unike.
Lidhur me pikën e tretë të rendit të ditës, u caktua vendi i grumbullimit të ekipeve kombëtare, te Goga Basket, përkatësisht femrat në datat 25 tetor7 nëntor dhe meshkujt në datat 9 - 23 nëntor. Këto data janë objekt ndryshimi në varësi të zhvillimeve të situatave si edhe kërkesave të trajnerëve. Të merren masat për përgatitjen e ekipeve kombëtare si edhe të plotësohen kushtet e veçanta të rekomanduara nga FIBA për këto evente. Lidhur me pikën e katërt të rendit të ditës, konfirmohen pjesëmarrjet me 6 ekipe kombëtare, përkatësisht: U-20 djem/vajza, u18 djem/vajza, U16 djem/vajza, në aktivitetet e Europianit të moshave për vitin 2021. Administrata sërish u ngarkua për të ndjekur ecurinë e regjistrimeve në gjykatë, të ndryshimeve sipas kërkesave ligjore, të shoqatave anëtare, për të vijuar me asamblenë statutore".