Fetel: Më vjen keq Hamilton, por Shumaker ishte më i fortë
Piloti i Ferrarit krahason dy ikonat e Formulës 1
Me fitoren e arritur në Nurburgring, Luis Hamilton barazoi rekordin e jashtëzakonshëm të Majkëll Shumakerit me 91 fitore në garat e Formulës 1. Paraqitjet dhe karriera e jashtëzakonshme e pilotit britanik kanë bërë që së fundmi krahasimet mes tij dhe legjendës Majkëll Shumaker të jenë temë dite në botën e automobilizmit. I fundit që është prononcuar lidhur me këtë krahasim është Sebastian Fetel. Piloti i Ferrarit sigurisht që nuk mund të konsiderohet asnjanës, duke qenë së është rritur me imazhin e Shumit dhe ëndrrën për t'u bërë si ai. Fetel, edhe pse asnjëherë nuk e fshehur vlerësimin për një rival si Hamilton, nuk ka dyshim se cili qëndron më lart. Megjithatë, është një konsideratë që duhet marrë parasysh pasi kemi të bëjmë me një pilot që i njeh nga afër të dy. Pas Shumakerit dhe Hamiltonit, me nga 91 suksese në Formulën 1, qëndron pikërisht Fetel me 53 triumfe. 4 herë kampioni i botës fillimisht u shpreh kështu për rekordin që piloti i Mercedesit arriti të dielën e kaluar: "Kam shumë respekt për arritjen e Luis
Hamiltonit. Është një numër fitoresh, të cilin mendoja se nuk do ta arrinte kurrë asnjë dhe tashmë mendoj që është e sigurt se do ta thellojë këtë rekord", deklaroi piloti aktual i Ferrarit. Megjithatë, Fetel shikon përtej shifrave, pasi edhe pse ai e di që Hamilton do ta kalojë çdo rekord, është i mendimit se britaniku nuk do të jetë kurrë në nivelin e ish-pilotit gjerman. "Shumaker do të jetë gjithmonë heroi im. Ai ka pasur diçka të cilën nuk e kam parë tek asnjë pilot deri më sot", tha Fetel, i cili kur ishte fëmijë udhëtonte më të atin 250 km për të shkuar në Karpen, pista e familjes Shumaker. "Mendoj që Majkëll kishte një talent natyral shumë të vështirë për t'u shpjeguar. Këtë e kupton mirë nëse e shikon në garat kart dhe jam i lumtur që kam qenë me Shumin disa herë në skuadër te 'Race of Champions'. Si në kart ashtu edhe te 'Race of Champions' dallohen qartë aftësitë e tij natyrale. Siç e thashë, aftësi të cilat nuk i kam parë tek asnjë pilot deri më tani", përfundoi Sebastian Fetel.