Ceferin: Europiani do të zhvillohet, numri i tifozëve...
Pavarësisht se me ardhjen e dimrit numri i të infektuarve me "COVID" në të gjithë Europën po shtohet, Aleksandër Ceferin, presidenti i UEFA-S, është i bindur se "Euro 2020" (ndonëse do të luhet në 2021 nuk e ka ndërruar emrin) do të zhvillohet me çdo kusht. "Për momentin, po e planifikojmë këtë kompeticion siç duam dhe siç meriton një turne i këtij niveli. Padyshim është një sfidë e madhe, duke parë situatën me Koronavirusin, por ju siguroj se Europiani do të zhvillohet me patjetër verën e ardhshme". Slloveni, në një intervistë për "Sportschau.de", ka sqaruar edhe faktin lidhur me prezencën e tifozëve në stadiume. Europiani kujtojmë se do të zhvillohet në 12 qytete të ndryshme të Europës, nga 11 qershori deri në 11 korrik 2021. "Kjo është tema më e vështirë për sa i përket turneut, por ne po mendojmë për të gjitha zgjidhjet, nga ajo pa tifozë, deri te mbushja e impianteve në 30, 50 apo 70 për qind të kapacitetit, - vazhdon Ceferin. - Realisht, nëse dikush në janar të këtij viti do më kishte thënë se kjo pandemi do të kishte bllokuar të gjithë botën, do ta kisha marrë për të çmendur, por tani mendoj se jemi që të gjithë më të përgatitur, më inteligjentë dhe me të fortë, për të parandaluar sa më shumë përhapjen e virusit. Këtë e konfirmon edhe fakti se nga muaji gusht e deri më tani, kemi organizuar 420 ndeshje ndërkombëtare, pa regjistruar asnjë aksident të rëndë dhe kjo na bën optimistë edhe për Europianin, - vazhdon kreu i UEFA-S, që në fund duket se nuk është shumë i lumtur me formulën e aprovuar nga paraardhësi i tij, Mishel Platini, që Europiani të luhet në 12 qytete të ndryshme. - Nga pikëpamja simbolike është diçka e bukur, por për mua dhe stafin tim jo. Nuk jemi të lumtur për disa spostime kaq të largëta që detyrojnë ne organizatorët dhe mbi të gjitha kombëtaret pjesëmarrëse. Gjithsesi, tani nuk mund të ndryshojmë më asgjë, pavarësisht pandemisë".