Bylisi dhe Albpetroli saldojnë të njëjtin rezultat në miqësore
Sfida mes dy ekipeve mbyllet sërish 1-3 për ballshiotët
Albpetroli dhe Bylisi nuk ndalen së u përballuri me njëri-tjetrin. Edhe këtë radhë dy ekipet fqinje, janë ndeshur në stadiumin "Alush Noga", Patos. Takimi ka nisur me një skemë të patosarakëve, me anë të një topi të gjatë për të qenë në befasi, por mbrojtja mike nuk mund të binte kaq kollaj dhe i kundërpërgjigjet menjëherë me një sulm të shpejtë nga krahët ku afrikani Antoni Beji, nuk gabon në zonën e rreptësisë dhe përshëndet rrjetën vendase që në minutën e 5-të. Albpetroli i kapur në befasi arrin të ringrihet dhe të organizohet në mes fushë me Hidershajn e Ballën, por miqtë janë më triumfues për topin e parë, duke këmbëngulur në dyfishimin e shpejt të rezultatit. Në minutën
e 15-të, Bylisi arrin të dalë përpara me Laval, i cili driblon dy lojtarë, por mbrojtja vendase është e vëmendshme këtë herë në vertikalizim. Në minutën e 20 pas një daljeje të bukur të vendasve dhe këmbënguljes së vazhdueshme për të vënë baraspeshat, patosarakët përfitojnë një penallti dhe i zakonshmi Balla nuk gabon nga
pika e bardhe e 11 metrave. Barazimi zgjati vetëm 17 minuta, pasi Loual atë të cilën nuk e bëri pak më parë e finalizoi në minutën e 37-të, pas një marrje të mirë të topit nga Mellugja dhe goditja vrastare e tij ka përfunduar në rrjetën e mbrojtur nga Mesutaj.
Në pjesën e dytë Albpetroli mundohet të gjej sërish rrugën për të
barazuar sfidën, por nuk ia del. Përpjekjet e Ballës, Muhametajt dhe Hidershaj janë të kota. Nga ana tjetër, Bylisi qarkullon topin, vertikalizon, sulmon dhe për disa minuta e mbyll Albpetrolin në zonë, por pa rezultat. Në pjesën e dytë, si Dovedan dhe Miho kryejnë zëvendësime të shumta, por pavarësisht këtyre, ritmi i lojës nuk bie.
Loja bëhet më interesante në 10 minutat e fundit, por fitues dalin mallakastriotët, të cilët i vënë vulën me anë të Qardakut në minutën e 86-të për ta mbyllur këtë sfidë në shifrat 1-3. Në përfundim, ajo çka është me interesantja të thuhet është se kjo është miqësorja e disata radhazi përfundon me shifrat e njëjta, 1-3. LUIS FEJZULLAH