Mbrojtja vihet përpara "gjyqit", Eriksen mbetet objekt misterioz

Antonio Konte e kishte thënë në prag të sfidës me Milanin dhe e përsëriti pas humbjes: "Nuk mund të ankohemi për mungesat apo të kapemi në motivime jashtë futbollit, por të luajmë me përgjegjësi. E, në fakt, Interi humbi derbin përgjithësisht për fajet e veta. Faktori Ibra dhe rregulli i Milanit ndikojnë në peshore, por akoma më shumë gabimet në mbrojtje dhe mungesa e saktësisë në pasimin e fundit apo përpara portës". GOLAT E PËSUAR - Reparti më i goditur nga mungesat ishte edhe ai që zhgënjeu më shumë gjatë mbrëmjes: mbrojtja. Një situatë vështirësie që mesfusha nuk arriti të maskonte, i kritikuari Galjardini bëri të dallohen gabimet e Brozoviçit jo vetëm në nivel ekuilibri, por edhe në motivim. Tetë gola të pësuar në katër ndeshje bëjnë të nisë alarmi i kuq dhe nuk është e thënë që Bastoni dhe Shkriniar të mjaftojnë, pasi vështirësia ishte edhe taktike, në nivel lëvizjesh dhe lidhjesh mes reparteve. Së paku në këto kushte Konte mund të largohej nga dogma e 3-5-2 dhe të rrezikonte një kalim te mbrojtja me katër, duke tërhequr Vidalin në mbrojtje (rol që e ka bërë në kombëtare) apo duke përdorur D'ambrozion si qendërmbrojtës përkrah De Vraj. Keq edhe zinxhiri në të majtë ku Perisiç në korsinë anësore duket një eksperiment i humbur, ndërsa eksperienca nuk shpëtoi Kolarovin, ndoshta më i dobëti në fushë. Është e vështirë, megjithatë, të mos përmendet faktori lodhje i lidhur me kombëtaret, dhe dita e vetme e plotë në gatishmëri për t'u stërvitur me rangje të plota. Vetëm Barela dhe Lukaku janë shfaqur të palodhur, ndërsa të tjerë si Vidal e Lautaro u shuan dhe Sançez luajti pak për të mos rrezikuar dëmtime pas Kilit. Të gjitha situata që kanë ndikuar në mungesën e kthjelltësisë në 20 metrat e fundit, ku janë parë pasime elementare të gabuara dhe zgjedhje sulmuese të pakuptueshme. DANEZI MISTERIOZ - Eriksen, ndërkohë, mbetet misteri. Danezi, i rigjallëruar nga golat me përfaqësuesen, është rikthyer shpejt në formatin "Seri A": i hutuar, pa një vendosje fikse në fushë dhe i paaftë të organizojë lojën. Thuajse një vit larg zbarkimit të tij në Itali, dyshimet lidhur me përfshirjen e tij në një realitet si ai interist bëhen dalë ngadalë siguri: edhe nga ai pritet një kthesë, në rast të kundërt mund të ketë një largim paraprak në janar. Konte megjithatë kërkoi të nënvizojë manovrën e Interit, që pas 20 minutash shpërqendrimi rimori kontrollin, duke krijuar rastet e duhura, duke merituar edhe golin e barazimit, por që si pasojë rrezikoi prapa.një mungesë ekuilibri kjo që duhet zgjidhur sa më parë. Në fund, pas derbit, duket vetëm një siguri e këtij Interi: pankarta "këtu punohet". Punime që duhet të kryhen sa më shpejt, meqenëse të mërkurën do të jetë koha për të zbritur sërish në fushë. Një gabim kundër Mynshengladbahut mund të kushtojë më shtrenjtë se një nisje e ngadaltë në kampionat.