Kastrioti në formë, Shkalla: Gati ta përballojmë sezonin
Miqësorja me Tiranën ka rritur adrenalinën
Kastrioti po vijon që ta shfrytëzojë këtë bojkot të kampionatit për konsolidimin e skuadrës dhe jo më kot po zhvillon miqësore rregullisht të mërkurë dhe të shtunë. Kjo kohë i ka dhënë mundësi stafit teknik për të parë gabimet te skuadra dhe për t'i riparuar ato, por nga ana tjetër i ka shërbyer edhe skuadrës e cila është rritur shumë javë pas jave. Testi i së mërkurës ndaj Tiranës dha sinjale pozitive te stafi teknik, pasi formacioni titullar, deri në momentin kur u zëvendësuan me lojtarët e stolit, zhvilloi një ndeshje të mirë, dhe po udhëhiqte 1-0 ndaj bardhebluve. Madje, pati një dominim mbi kundërshtarin në ato minuta që u luajt me formacionin e plotë. Stafi teknik, krahas anës pozitive, ka parë edhe disa defekte të vogla të cilat do të kërkojë t'i eliminojë në miqësoren e radhës, e cila do të zhvillohet në fundjavë ndaj Burrelit, në transfertë. Shkalla- Një nga përforcimet e Kastriotit në merkaton e verës është edhe Silvestër Shkalla. Qendërmbrojtësi, i cili ka një eksperiencë të madhe në Superiore me Teutën dhe me Bylisin, në një prononcim për "Panorama Sport", flet për skuadrën e re, ambientimin, rritjen e skuadrës gjatë javëve të fundit, bojkotin e kampionatit, si edhe për objektivat e skuadrës dhe ato personale. "Në skuadër më kanë pritur shumë mirë dhe e kam ndier veten sikur kisha kohë te Kastrioti, e jo si lojtar i ri. Për këtë dua të falënderoj çunat e ekipit për mikpritjen. Gjatë kësaj kohe që jam pjesë e Kastriotit, përgatitjet kanë ecur shumë mirë, ku të gjithë janë stërvitur me përkushtim të plotë, duke treguar seriozitet maksimal, si nga lojtarët po ashtu dhe nga stafi teknik. Edhe pse kampionati po shtyhet javë pas jave, normalisht ne nuk na bën mirë kjo pjesë. Kjo periudhë është po aq
e vështirë sa ajo që kaluam në karantinë pa futboll, ndaj na mungojnë shumë ndeshjet zyrtare. Zhvillimi i miqësoreve çdo javë, na ka shërbyer shumë, ku krahas rregullimit të ndonjë mangësie, na kanë shërbyer edhe për të ruajtur formën fizike. Normalisht, ne kemi lojtarë me eksperiencë në skuadër dhe të rinj me perspektivë. Kemi një kontigjent të mjaftueshëm për të përballuar kampionatin, por edhe për të arritur objektivat e klubit. Shpresojmë që fillimisht të nisja sa më e shpejt e sezonin, në mënyrë që më pas ndeshjet e shpeshta të mos ndikojnë në dëmtime. Objektivat? Siç e thash më lart, me kontigjentin që kemi, jam i bindur që do t'i arrijmë objektivat sezonal, ndërsa personalisht kam synime shumë të thjeshta: të jap më të mirën në çdo ndeshje, dhe në qoftë se plotësohen objektivat e klubit dhe unë e kam kryer misionin", deklaroi Silvestër Shkalla. BUJAR BALLIU