Hafizi dhe Rragami, fiktivë te këshilli mbikëqyrës i Vllaznisë
Ish-trajnerët nuk firmosin për shkarkimin e Licit
Benjamin Naku është administratori i ri i Vllaznisë pas dorëheqjes së Suad Licit. Ndryshimi i fundit te klubi shkodran është bërë edhe në QKB (Qendrën Kombëtare të Biznesit). Përveç zëvendësimit të administratorit, në QKB është bërë edhe shtimi i anëtarit të ri të këshillit mbikëqyrës, Gjulio Zefi, i cili zë vendin e Benjamin Nakut te bordi i klubit. E çuditshme është se anëtari i ri, ende pa u regjistruar në QKB, ka firmosur në vendimin që ka marrë këshilli mbikëqyrës. Nga ajo që vihet re në vendimin e zbardhur, shikohet se kanë firmosur tre nga pesë anëtarë, ku dy ikona të futbollit shkodran, Astrit Hafizi dhe Ramazan
Rragami, janë thjesht fiktivë në këshill, pasi nuk e kanë ushtruar të drejtën e firmës. PËRGATITJET - Vllaznia ka vijuar edhe dje përgatitjet në pritje të startit të sezonit. Pavarësisht problemeve të shkaktuara nga pandemia, trajneri Brdariç nuk e ka ulur ritmin e punës, duke u qëndruar strikt planeve të tij. Në
seancën e djeshme nuk kanë qenë të pranishëm 5 lojtarë. Ka munguar Isaevski, që pritet t’i nënshtrohet tamponit të dytë, ku pret përgjigjen negative. Përveç Isaevskit, për të njëjtën arsye vijojnë të mungojnë edhe Adili, Mandiangu, Da Silva dhe Dunga. Gjithsesi, ekipi nën drejtimin e stafit ka vijuar normalisht punën.
DUNGA - Nga të prekurit me “COVID-19” ka edhe të karantinuar që në asnjë moment nuk po e ndalin punën. Sulmuesi Ismael Dunga është njëri prej tyre. Sulmuesi vijon stërvitjen individuale pa ndier asnjë shqetësim për sa i përket prekjes me “COVID-19”. Keniani ka thyer karantinën dhe është stërvitur individualisht në stadiumin “Loro Boriçi”. Një gjë jopozitive, gjithsesi lojtari tregon se gëzon një formë dhe gjendje të mirë. Dunga e ka bërë vetë publike një gjë të tillë duke postuar një video nga stërvitja në stadium. Lojtari nuk kërkon që të humbë asnjë minutë nga stërvitja, ndonëse rregullorja e pandemisë ia ndalon rreptësishtë daljen jashtë banesës.
MIQËSORJA - Superiorja nuk do të nisë as këtë fundjavë, kështu që skuadrat po planifikojnë miqësore të tjera. Mësohet se nesër Vllaznia do të përballet me Bylisin. Një miqësore që do të jetë ndaj një skuadre që pritet të jetë një rivale për kuqeblutë në Kategorinë Superiore. ADMIR URUÇI