"Është ndeshje spektakolare, por jo aq shumë vendimtare"
Legjendat e Barcelonës dhe të Realit të Madridit mendojnë se dueli i së shtunës do të jetë spektakolar. Klajvert, Eto, Pyjol, Redondo, Guti dhe Hierro e konsiderojnë një duel të rëndësishëm, por disa prej tyre thonë se nuk varen fatet e sezonit prej kësaj ndeshjeje.
KLAJVERT - "Mendoj se këtë herë nuk është ndeshje shumë vendimtare sepse luhet shpejt dhe kampionati vendoset nga të gjitha sfidat, por 'El Clasico' është 'El Clasico' dhe të gjithë futbollistët duan që ta fitojnë e të thuash që do të vendosë shumë për të ardhmen e kampionatit është e kotë. Megjithatë, është ndeshje shumë e rëndësishme".
ETO - "Kjo është një ndeshje e jashtëzakonshme, por pa tifozë është e çuditshme. Është sfidë unike dhe shpresoj që futbollistët të na dhurojnë spektaklin që duam të shohim të gjithë".
REDONDO - "Është shumë e vështirë të flasësh për favoritë në këtë sfidë. Pritshmëritë janë shumë të mëdha. Forma dhe ecuria e skuadrave vlejnë shumë pak si analiza përpara sfidës. Kjo është një ndeshje jashtë kontekstit dhe i surprizon të gjithë. Si madrilen nuk mund t'i fsheh dëshirat e mia, por shpresoj që të ketë spektakël dhe një futboll të një niveli të lartë".
GUTI - "Jam dakord me Patrikun (Klajvert), i cili thotë që kjo ndeshje nuk është shumë e rëndësishme, por në aspektin psikologjik vlen shumë për ekipin që e fiton këtë sfidë. Është një test për të dyja skuadrat, për të treguar në çfarë niveli janë dhe deri ku mund të shkojnë".
HIERRO -"Kjo është hera e parë që luhet një 'klasike' pa tifozë dhe nuk e dimë se si do të ndikojë te futbollistët. Për skuadrën vizituese dhe për arbitrin është diçka e mirë, por të shohim se çfarë do të ndodhë. Është diçka e re, me të cilën nuk jemi mësuar. Është mëkat që një ndeshje e tillë nuk ka tifozë në stadium".
PYJOL - "Në javën e fundit në kampionat të dyja skuadrat humbën dhe do të kërkojnë patjetër që të ringrihen në këtë sfidë për të nxjerrë rezultat pozitiv. Shpresoj që të jetë në favorin e Barcelonës dhe t'i bëjnë gjërat ashtu siç duhet".