Shënon dhe garanton pikë, Interi në shpinën e Lukakut
Bën punën “e pistë”, thelbësor për skuadrën dhe Konten
Në shpatullat e gji gantit. Në startin e ndërlikuar të sezonit të Interit, i përkeqësuar nga “COVID” dhe më në vuajtje nga se parashikohej në kampionat dhe Kupë, një nga siguritë është Romelu Lukaku, edhe një herë tjetër shpëtimtar dhe ikonë shprese kur situata nuk është nga më të mirat. Megjithatë, rezultati nuk kënaq aspak bomberin belg, i cili në fund të ndeshjes qëndroi me duart në fytyrë (siç shikohet nga fotografia e publikuar nga “Sky Sport”) për një minutë përpara se t’u dedikohej intervistave të rastit, ku, dukshëm i mërzitur, shprehu gjithë hidhërimin e tij për barazimin.
STATISTIKAT FLASIN QARTË - Puna “e pistë” e belgut nisi menjëherë, në fillim të sezonit. Me skuadrën e tij në disavantazh 3-2 kundër Fiorentinës, në “San Siro”, ishte numri 9 që riktheu ndeshjen në favor 3 minuta nga fundi, duke i dhënë mundësi D’ambrozios të firmoste golin e tri pikëve. Më pas erdhi dopieta me Beneventon, në rikuperimin e javës së dytë, ku Romelu hapi dhe mbylli ndeshjen, faktikisht, me golin e 3-0 (përfundoi 5-2). Vetëm një kalim bosh, me Lacion në javën e tretë, për të rimarrë vrullin në derbi kundër Milanit (goli i tretë kundër kuqezinjve në po aq ndeshje) dhe i vazhduar të mërkurën, me dy golat kundër Borusia Mynshengladbahut që i evituan Kontes humbjen në debutim në Champions. Ka shënuar në thelb gjysmën e golave të Interit deri tani këtë sezon (14 në total, 6 të belgut në 5 ndeshje) dhe golat e tij kanë siguruar katër nga tetë pikët e regjistruara deri tani në Serinë A dhe Champions. Pra, vendimtar? Më shumë, thelbësor.
SERIA EUROPIANE – Më pas vijnë disa të dhëna në sytë e të gjithëve: Lukaku është në seri pozitive, në Europë, ku prej nëntë ndeshjesh radhazi (dy në Champions-in e fundit, 6 në Ligën e Europës dhe të mërkurën me Gladbahun) si Levandovski. Në shënjestër është CR7, i cili në kompeticionet europiane është ndalur në 11 ndeshje radhazi me së paku një gol të shënuar: 11, si golat e realizuar nga Lukaku në këto 9 ndeshje. Ah, pa harruar: në 2 ndeshjet me kombëtaren kundër Anglisë dhe Islandës, Lukaku shënoi të 3 golat e Belgjikës. Nuk ka më vend për t’u befasuar, por vetëm shpresë që të vazhdojë kështu.