Hamilton-rozberg, dueli zhvendoset jashtë asfaltit
Britaniku dhe gjermani, pjesë e kampionatit “Extreme E”
Duelet ndërmjet Luis Hamiltonit dhe Niko Rozbergut duket se nuk do të marrin fund asnjëherë. Nëse në të shkuarën dy pilotët janë përballur duke nisur që nga garat Kart për të vijuar më pas në Formulën 1, aty ku kanë dhuruar një rivalitet të jashtëzakonshëm, tashmë “lufta” do të zhvendoset në kategorinë “Extreme E”, kampionat me makina elektrike “Rally”. Pra, rivaliteti këtë herë do të vijojë jashtë asfaltit, në shkretëtirë dhe në rrugë të akullta, ndërsa kampionati do të startojë në janar të vitit 2021 nga Senegali. Luis Hamilton e ka bërë të ditur pjesëmarrjen e tij në “Extreme E” rreth një muaj më parë, teksa do të garojë me skuadrën “X44”, ndërkohë së fundmi konfirmimi ka ardhur edhe nga Niko Rozberg, me gjermanin që do të jetë pjesë e makinës “RXR”. Sigurisht që nuk do të jetë një sfidë vetëm midis tyre, pasi do të jenë 9 skuadra që do të marrin pjesë gjatë edicionit të parë, por prezenca e dy kampionëve të botës në Formulën 1 e ka ndezur atmosferën disa muaj para nisjes së kampionatit. Ndërkohë, përveç luftës sportive, të dy pilotët i bashkon edhe kauza ambientaliste. Pas tërheqjes nga F1, Rozberg është përkushtuar shumë në betejën për të mbrojtur planetin, duke dhënë vazhdimisht mesazhe sensibilizuese, si dhe duke bërë apele për shfrytëzim të burimeve alternative të energjisë. Pikërisht edhe kampionati “Extreme E” ka si qëllim kryesor të mbështesë ndërgjegjësimin për këto tema dhe jo vetëm, pasi përfaqëson një mënyrë të luftës kundër ndryshimeve klimatike, që është edhe kërcënimi më i madh sot për planetin. Duke u kthyer te kompeticioni, “Extreme E”, siç e thamë, do të ngrejë siparin me garën e parë në Senegal, më pas do të vijojë në shkretëtirën e Arabisë Saudite, për t’u zhvendosur më tej në Himalaja. Një tjetër etapë do të mbahet në akullin e Groenlandës dhe edicioni i parë do të mbyllet në Amazonë. Në formatin e garës nuk parashikohet kronometrimi, pasi ekipet të cilat përbëhen nga një burrë dhe një grua, do të përballen “kokë më kokë” midis tyre.