Shqipëria sfidon sot Skocinë, Grima: Të paraqitemi denjësisht

Kombëtarja shqiptare e femrave ka udhëtuar dje drejt Skocisë, teksa sot do të zhvillojë ndeshjen e radhës të vlefshme për eliminatoret e “UEFA Women’s EURO 2022". Pas katër ditësh grumbullim në Shkodër, përfaqësuesja kuqezi ka mbërritur në Edinburgut dhe mbrëmjen e sotme në orën 20:30 do të sfidojë kombëtaren vendëse, takim që do të luhet në stadiumin “Tynecastle Park”. Trajneri Armir Grima, i cili për këtë sfidë ka thirrur 20 vajza, shprehet i kënaqur për impenjimin e shfaqur nga futbollistet e ftuara gjatë këtyre ditëve, ndonëse pandemia “COVID-19” ka sjellë edhe probleme duke ndikuar në zgjedhjet teknike. Duke folur para ndeshjes, tekniku i Kombëtares u shpreh: “Personalisht jam i kënaqur me impenjimin e vajzave gjatë këtyre ditëve në stërvitje. Normalisht në kohë të tillë pandemie kemi pasur edhe ne problemet tona, kemi mungesa të rëndësishme në skuadër, por duke parë impenjimin dhe dëshirën e vajzave, besoj se do të realizojmë një paraqitje të kënaqshme. Sigurisht, nuk janë problemet fizike ato që na shqetësojnë, por fakti se disa nga futbollistet nuk kishin mundësi t’i bashkoheshin skuadrës për shkak të pandemisë”. I pyetur për objektivat dhe për këtë transfertë të vështirë, Grima më pas tha: “Ne presim që të bëjmë një paraqitje sa më dinjitoze me Skocinë. Duke pasur parasysh faktin që edhe futbolli i femrave ka ardhur në rritje si edhe duke ditur që kemi përballë një ndër ekipet më të mira të Europës, është shumë e rëndësishme për ne që të bëjmë një përfaqësim sa më të mirë. Objektivi ynë në këto eliminatore është që të zhvillojmë ndeshje sa më të mira dhe të arrijmë të marrim maksimumin ndaj kundërshtarëve më të fortë që kemi përballë. Njëkohësisht synojmë që të lëmë poshtë nesh Qipron në renditjen e përgjithshme”, deklaroi ndër të tjera Armir Grima në prononcimin e tij për “FSHF.ORG”.