Dinamo nis merkaton, merr mesfushorin Bilali
Ka edhe largime nga kryeqytetasit, Jaupaj drejt Kosovës
Nis merkatoja për Di namon. Ashtu sikundër pati paralajmëruar vetë administratori Ermal Barushi, përforcimi i parë do të vinte në mesfushë. Goditja e parë është pikërisht për këtë repart dhe bëhet fjalë për Dejvi Bilalin. Lojtari në fjalë vjen nga Vora (ku është aktivizuar për 477 minuta pas 6 ndeshjesh), por gjatë karrierës së tij ka qenë pjesë edhe e skuadrave si Vllaznia, Teuta, Besa, Turbina, Elbasani, Egnatia. Ishte vetë klubi që konfirmoi marrëveshjen me 24vjeçarin, i cili është prezantuar zyrtarisht si lojtari më i ri i 18herë kampionëve të Shqipërisë. Ai është vënë direkt nën urdhrat e stafit teknik. Megjithatë, me përforcimet nuk do të mbyllen këtu llogaritë. Klubi po punon për dy afrime të tjera, me të cilat mund të kompletohet edhe organika për pjesën e mbetur të sezonit. Kryeqytetasit duan ngjitjen në elitë dhe për t’ia dalë, pretendojnë që të kenë çdo rol të dubluar, por edhe një stol të bollshëm e me cilësi. Nuk mund të mos kishte edhe rrjedhje. Përfundimisht është larguar Ardit Jaupaj. Sulmuesi
ka prishur marrëveshjen me konsensus, për mungesë hapësire. Beratasi ka gjetur ekip në Kosovë, atje ku pritet që të ketë minuta dhe përfitime më të mëdha financiare. Sakaq, skuadra ka vazhduar përgatitjet edhe dje. Paradite janë ushtruar në palestër,
ndërsa gjatë mesditës në fushë. Ardhja e italianëve Françesko Moriero e Fabricio Mikoli në stol ka shtuar ndjeshëm entuziazmin në radhët e ekipit. Lojtarët po shfaqin “xixa” në çdo seancë, pasi kërkojnë të bindin stafin teknik për të zënë një vend në formacionin titullar.