Mallkimi, Kjaer dhe Çalhanoglu mbajnë në ankth “Djallin”
Ante Rebiç dhe Rade Kruniç ishin dy lojtarët e rezultuar pozitivë në testin ANTI-COVID përpara ndeshjes me Juven. Dyshja do të mungojë për të paktën dy javë, por kohët mund të zgjaten në rast se vonon negativizimi i tyre. Në listë në orët e fundit janë shtuar edhe Simon Kjaer me Hakan Çalhanoglunë. Danezi luajti të gjithë pjesën e dytë kundër Juves me një fashaturë të madhe në kofshë dhe po lufton me kohën për të qenë gati për takimin e nesërm me Torinon në kampionat. Situatë pak a shumë e njëjtë për Hakan Çalhanoglunë që gjithashtu doli duke çaluar nga humbja e së mërkurës në kampionat. Turku ka dëmtuar kaviljen dhe do të mungojë ndaj Torinos, por situata e tij mban në ankth kuqezinjtë edhe për sfidat e ardhshme.
DREJT SHËRIMIT - Rikthimi i Tonalit nga skualifikimi dhe ai i afërt i Benaserit e qetësojnë disi Piolin për mesfushën, teksa edhe në sulm priten risi nga infermieria. Dy ditë më parë Zlatan Ibrahimoviç me anë të një postimi dha sinjale rikthimi dhe lajmi pozitiv për Piolin mund të vijë në kuadër të sfidës me Kaljari, siç e konfirmoi edhe vetë trajneri në konferencën për shtyp pas ndeshjes me Juven. Suedezi do të bëjë një test të fundit të martën e ardhshme, çka mund të bëjë që të jetë i disponueshëm për takimin në Sardenjë. Pak a shumë të njëjtat afate për Ismael Benaserin të cilin Pioli nuk ka ndërmend ta rrezikojë. Dëmtimi në kofshë ka kaluar e së shpejti algjeriani mund t'i bashkohet grupit, teksa si afat duket ndeshja ndaj Torinos në Kupën e Italisë të mërkurën e ardhshme. VONESAT - Dilemat më të mëdha kanë të bëjnë me Aleksis Selemekersin. Belgu ka një tërheqje dhe po ndjek kurat e fizioterapisë, ndërsa do t'i nënshtrohet një kontrolli nga ku do të merren vesh afatet e rikthimit që gjithsesi nuk do të jenë më herët se fundi i muajit. Edhe Mateo Gabia mund të punojë me qetësi, teksa rikthimi i tij pritet për në shkurt.