Pogradeci e nis vitin me “manita”, argëtohet me Maliqin
Pogradeci “shpërthen” në miqësore, mund 5 me 2 Maliqin. E para ndeshje për këtë vit ka kaluar me sukses për liqenorët. Përballja ka nisur e ekuilibruar në minutat e para, e megjithatë në të 18-ën mendoi Topllari të zhbllokonte shifrat. Pas një topi të ulur me kokë nga Dragoj, sulmuesi nuk fal. Reagojnë shpejt maliqarët me Cankën që gjuan nga distanca, por me vështirësi Berberi devijon, i ndihmuar edhe nga shtylla pingule. Janë sërish vendësit që dyfishojnë me Pengun në të 25-ën. Ky i fundit, pas një topi të dhënë nga Manellari, depërton nga e djathta, gjuan tokazi dhe 2-0. Presingu i vendësve vazhdon dhe në të 36-ën Topllari përfiton nga terreni i rrëshqitshëm dhe trefishon për liqenorët. Dhjetë minutat e fundit folën për maliqarët, por pa arritur të finalizojnë. Me fillimin e së dytës, ka shumë ndryshime në formacione. Laçka shpërthen direkt dhe në harkun e 7 minutave që realizon një dopietë (në të 50’ dhe 57’), duke çuar rezultatin në 5-0. Maliqarët kanë ngushtuar me Dario Kame nga pika e bardhë e penalltisë dhe Demollarin me një gjuajtje në afërsi të portës. Trajneri Ardian Abazaj ka marrë sinjale të mira nga lojtarët e Pogradecit, gjë që e pohoi edhe për gazetën pas miqësores: “E kishim të domosdoshme një ndeshje të tillë, pasi nuk luajmë javën e parë. Më vjen mirë që Pengu dhe Laçka shënuan, veç të zakonshmit Topllari. Ky i fundit do të jetë pikë referimi në sulm me Dragojin. Gjithsesi, loja ka treguar se ekipi do të ketë vazhdimësi pozitive”. ROMEO XINXIFI
Trajner:
Trajner: