“Baby” Aston Vila i reziston 45’ Liverpulit
Klop: Kemi lojtarë jashtë ritmi, patëm probleme gjatë lojës
Liverpuli preu biletën në 1/16-at e Kupës FA me një fitore 4-1 në fushën e Aston Vilës së prekur nga Koronavirusi. Por për ta zgjidhur çështjen e kualifikimit, skuadra e Jyrgen Klopit priti deri në pjesën e dytë, pavarësisht se përballë kishte një skuadër me lojtarë të akademisë dhe pa asnjë eksperiencë me skuadrën e parë. Shpërthimi i Koronavirusit në qendrën stërvitore të “Villains” këtë javë (10 lojtarë të skuadrës së parë dhe 4 të stafit teknik), po e dërgonte ndeshjen drejt një humbjeje në tavolinë për Aston Vilën, por ata vendosën që të provojnë të luajnë me një skuadër të përbërë nga lojtarët e ekipit U-23 dhe U18. Dhe pavarësisht se Sadio Mane shënoi pas vetëm katër minutash lojë për “Reds”-at, Vila qëndroi solide në
mbrojtje dhe në fund të pjesës së parë 17-vjeçari Lui Berri, me një të shkuar në akademinë e Barçës, shënoi edhe golin e barazimit. Por lodhja fizike e këtyre djemve të rinj u ndje në pjesën e dytë, kur miqtë nisën të ushtrojnë më shumë presion dhe shënuan tre gola në harkun e pesë minutave: dy të fundit u asistuan nga Xherdan Shaqiri. Vajnaldum riktheu Liverpulin në avantazh pas një ore lojë, Mane shënoi golin e tij të dytë dhe Salah vulosi rezultatin në 65’.
KLOP – “Ne patëm probleme me futbollin. Kishim nevojë për pak më shumë kohë. Kishim probleme në pasim dhe lëvizje. Nuk bëmë mjaftueshëm rikuperime topi. Patëm shanse për të shënuar, por gjuanim direkt te portieri, por ndryshuam në pjesën e dytë. Ishim pak të plogësht,
por më mirë pas pushimit”, tha trajneri i Liverpulit, i cili tani do të ketë 9 ditë pushim përpara se të përballet me Mançester Junajtidin në Premier Ligë: “Kemi shumë lojtarë me mungesë ritmi. Do të bëjmë shumë ndeshje miqësore 11 kundra 11 në stërvitje”.