KOKSH, akuza nga Bezhani: Asambleja është e falsifikuar
Presidenti u bën thirrje anëtarëve të distancohen: Është e jashtëligjshme dhe sulm politik
Me kërkesën e firmosur në dhjetor nga 2/3 të anëtarëve, Komiteti Olimpik Kombëtar Shqiptar do të zhvillojë ditën e nesërme asamblenë e jashtëzakonshme. Ndonëse KOKSH vijon të mos bëjë asgjë publike në faqen e saj zyrtare, nesër në orën 10:00 në ambientet e hotel “Mak Albania” sipas asaj që bëjnë të ditur federatat do të zhvillohet asambleja, e cila do të ketë këtë rend dite: “1- Vendim mbi shkarkimin e presidentit aktual të KOKSH, Viron Bezhani. 2- Miratimin e ndryshimeve statutore sipas draft-statutit të hartuar. 3- Zgjedhja e anëtarëve të komisionit të verifikimeve dhe etikës. 4- Përcaktimi i datës së zgjedhjeve të organeve drejtuese të KOKSH nga Komiteti Teknik”. Por në prag të kësaj asambleje ka reaguar presidenti i KOKSH, Viron Bezhani, i cili e quan të jashtëligjshme dhe hedh akuza të forta për falsifikim, teksa thotë se bëhet fjalë për sulm politik. Ja deklarata e Bezhanit: “U bëj thirrje publikisht që të distancoheni nga çdo eksponent politik që synon të ‘kapë’ Komitetin Olimpik. Ju bëj me dije se kërkesa e pretenduar e anëtarëve është e falsifikuar. Kjo shkresë ka përmbajtje të ndryshme nga ajo që kanë parë personat kur kanë firmosur. Në një moment të dytë pasi janë mbledhur firmat në një listë pa përmbajte u është bashkangjitur shkresa. Këtë gjë ma kanë konfirmuar një pjesë e madhe e anëtarëve të cilët i kam kontaktuar. Në këto rrethana ju njoftoj që kam paraqitur një kallëzim penal për nismëtarët keqdashës, të cilët janë në shërbim të politikës. Asambleja e datës 10 janar është thirrur në mënyrë të paligjshme, në kundërshtim me statutin dhe me çdo parim demokratik. Kushdo që e drejton këtë asamble do të mbajë përgjegjësi para ligjit. Ju bëj thirrje që të distancoheni nga çdo veprim i jashtëligjshëm, ndërsa ju vë në dijeni se po ushtrohen presione politike ndaj anëtarëve, për të cilat kam fakte dhe që do t’ua paraqes në kohën e duhur publikut, ndërkombëtareve dhe çdo institucioni tjetër sportiv dhe jo sportiv. Duke shpresuar në reflektimin tuaj kam bindje se ky sulm politik ndaj KOKSH do të dështojë”, deklaron Viron Bezhani.