Alarmon virusi, Olimpiada në rrezik

Kompania e transmetimit e shqetësuar: Nuk e dimë nëse do të bëhet aktiviteti

Kaosi që shkaktoi vi rusi COVID-19 siç dihet solli edhe shtyrjen me 1 vit të eventit më madhor sportiv siç janë Lojërat Olimpike, të cilat parashikoheshin të mbaheshin verën kaluar. Duke parë situatën e krijuar u vendos që olimpiada e Tokios të spostohej për këtë verë. Megjithatë, edhe pse data po afrohet, ende ka hije dyshime dhe paqartësi mbi këtë aktivitet, për shkak të përshkallëzimit të gjendjes me Koronavirusin. Japonia dhe me konkretisht Tokio është kthyer në epiqendër të një vale të tretë infektimesh gjë që e vendos në rrezik të madh zhvillimin e Lojërave Olimpike. Lidhur me këtë situatë është prononcuar edhe një prej anëtarëve të Komitetit Olimpik Ndërkombëtar, Dik Paund, i cili është gjithashtu edhe president i kompanisë së transmetimit “Olympic Broadcasting Service”. Në një intervistë për BBC, Paund shprehu shqetësimin për valën e tretë të virusit që po godet Japoninë, duke konfirmuar se zhvillimi i olimpiadës është në rrezik. “Nuk jemi të qartë nëse Lojërat Olimpike ‘Tokio 2020’ do të mbahen këtë verë sepse qyteti që do t’i presë ka shpallur emergjencën për shkak të Koronavirusit. Tani problemi kryesor është vala e virusit që po godet Japoninë”, deklaroi Dik Paund. Javët e fundit shteti aziatik po goditet rëndë nga infektimet dhe duke parë këtë situatë, kryeministri japonez Ioshihide Suga ka deklaruar gjendjen e emergjencës për 1 muaj në

Tokio si dhe në tri prefektura pranë kryeqytetit. Masat janë futur në fuqi ditën e djeshme, ndërsa ekspertët thonë që kjo situatë pritet të zgjasë edhe më shumë se një muaj. Një lajm aspak i mirë ky për sportin botëror e gjithashtu edhe për Shqipërinë që do të marrë pjesë në këtë event. Aktualisht të vetmit sportistë kuqezinj që janë brenda normës olimpike janë atletja Luiza Gega dhe peshëngritësi Briken Calja. Sportistë që premtojnë rezultate të larta, e pse jo të sjellin edhe medaljen e parë olimpike në historinë e vendit tonë.